ଏକତରଫା ପ୍ରେମରେ ଫେଲ୍ ହୋଇ ପେଟ୍ରୋଲ ଢାଳିଲା ବିଫଳ ପ୍ରେମିକ

ଏକତରଫା ପ୍ରେମର କରୁଣ ପରିଣତି। ନାବାଳିକା ପ୍ରେମିକା ଉପରେ ପେଟ୍ରୋଲ ଢ଼ାଳି ପୋଡି ମାରିବାକୁ ଉଦ୍ୟମ କରିଛି ବିଫଳ ପ୍ରେମିକ।

ଭଦ୍ରକ: ଏକ ତରଫା ପ୍ରେମରେ ବିଫଳ ହେବାପରେ ପ୍ରତିଶୋଧର ନିଆଁରେ ପ୍ରେମିକ। ଯାହାର ଶିକାର ହୋଇଛି ଜଣେ ନୀରିହ ନାବାଳିକା। ନାବାଳିକାଙ୍କୁ ପେଟ୍ରୋଲ ଢ଼ାଳି ପୋଡି ମାରିବାକୁ ଉଦ୍ୟମ କରିଛି ବିଫଳ ପ୍ରେମିକ। ଏଭଳି ଘଟଣା ଘଟିଛି ବାସୁଦେବପୁର ବ୍ଲକ ଅନ୍ତର୍ଗତ ନୂଆଗାଁ ଗ୍ରାମରେ। ଗୁରୁତର ନାବାଳିକା ହେଲେ ସେହି ଗାଁର ବୁଧିରାମ ତରାଇଙ୍କ ଝିଅ ସୀମା ତରାଇ।

ସୂଚନା ଅନୁଯାୟୀ, ବୁଧବାର ସୀମା ଘରେ ଥିବାବେଳେ ସେହି ଗାଁର ସିଦ୍ଧାର୍ଥ ମଳିକ ନାମକ ଯୁବକ ତାଙ୍କୁ ଘରୁ ଡାକି ନେଇ ଭଲପାଏ ବୋଲି କହିବା ସହିତ ତାସହ ବାହାରକୁ ଯିବାକୁ କହିଥିଲା। ହେଲେ ଏଥିରେ ସୀମା ଅରାଜି ହେବାରୁ ସିଦ୍ଧାର୍ଥ ତା ଦେହରେ ପେଟ୍ରୋଲ ପକାଇ ନିଆଁ ଲଗାଇ ଦେଇଛି।

ସୀମା ଚିତ୍କାର କରିବାରୁ ପରିବାର ଲୋକ ତାଙ୍କୁ ଉଦ୍ଧାର କରି ବାସୁଦେବପୁର ମେଡିକାଲକୁ ନେଇଥିଲେ। ହେଲେ ସେଠାରେ ତାର ଅବସ୍ଥା ଗୁରୁତର ହେବାରୁ ତାଙ୍କୁ କଟକ ମେଡିକାଲକୁ ପଠାଯାଇଥିବା ଜଣାପଡିଛି। ବାସୁଦେବପୁର ଥାନାରେ ପରିବାର ଲୋକ ଏନେଇ ଅଭିଯୋଗ କରିବା ପରେ ପୋଲିସ ତଦନ୍ତ ଆରମ୍ଭ କରିଛି।

ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ