ଭଦ୍ରକ: ଉଇଁଲା ସୂର୍ଯ୍ୟ। ଭାଙ୍ଗିଲା ଧାରା। ପ୍ରଥମ ଥର ବିଜେଡିର ମହିଳା କାର୍ଡ ଫେଲ । ଯାହାକି ପୁଣି ଥରେ ଧାମନଗର ବିଧାନସଭା ନିର୍ବାଚନମଣ୍ଡଳୀ ରେ ପ୍ରମାଣିତ ହୋଇଛି ଧାମନଗରବାସୀ ସର୍ବଦା ଦକ୍ଷ ନୂଆ ମୁହଁ ବାଛନ୍ତି। ଏହାର ନଜିର 1995 ରୁ 2022 ପର୍ଯ୍ୟନ୍ତ ହୋଇଥିବା ସମସ୍ତ ନିର୍ବାଚନ। 1995 ରୁ ଡାଟା ବେସ ନେଇ ବିଜେଡି ଆକଳନ କରିଥିଲା ମହିଳା କାର୍ଡ ସଫଳ ହେବ ବୋଲି । ହେଲେ ଭୁଲ ହେଲା ଆକଳନ। ଭାଙ୍ଗିଲା ପରମ୍ପରା। ଜିତିଲା ବିଜେପି। ଧାମନଗର ଉପନିର୍ବାଚନ ରେ ବାଜି ଏଥର ବିଜେପି ସପକ୍ଷରେ ଯାଇଛି ।
ବିଜେପି ପ୍ରାର୍ଥୀ ବିଜୟ ପରେ ଆଜି (ସୋମବାର) ବିଜେପିର ନେତା , କର୍ମୀ ଓ ସମର୍ଥକ ମାନେ ବେଶ ଉତ୍ଫୁଲିତ ଅଛନ୍ତି । ନବ ନିର୍ବାଚିତ ବିଧାୟକ ସୂର୍ଯ୍ୟବଂଶୀ ସୁରଜ, ବରିଷ୍ଠ ବିଜେପି ନେତା ମନମୋହନ ସାମଲଙ୍କ ସହ ଭଦ୍ରକର ପ୍ରସିଦ୍ଧ ଶୈବ ପୀଠ ବାବା ଆଖଣ୍ଡଳମଣିଙ୍କ ଆଶୀର୍ବାଦ ନେଇଛନ୍ତି । ଭଦ୍ରକରୁ ବାହାରିବ ପରେ ରାସ୍ତାରେ ବିଭିନ୍ନ ସ୍ଥାନରେ ଦଳୀୟ କର୍ମୀ ଏବଂ ଜନସାଧାରଣ ତାଙ୍କୁ ବିପୁଳ ବିଜୟ ସମ୍ବର୍ଦ୍ଧନା ପ୍ରଦାନ କରିଥିଲେ। ଭୋଟର ମାନଙ୍କୁ ଧନ୍ୟବାଦ ଦେବା ସହିତ ଜନତାଙ୍କ ଆଶୀର୍ବାଦ ନେଇଥିଲେ ।