ଭଦ୍ରକ: ଧସିଲା ମନ୍ତେଇ ନଦୀର ଶହେ ଫୁଟର ନଦୀ ସୁରକ୍ଷା ବନ୍ଧ । ଆତଙ୍କିତ ଅବସ୍ଥାରେ ଉପକୂଳ ଗାଁ କନକପଲ୍ଲୀବାସୀ । କୌଣସି ସମୟରେ ବି ଗ୍ରାମକୁ ଆସିପାରେ ବିପଦ । ଗ୍ରାମ ମଧ୍ୟରେ ନଦୀ ପାଣି ପଶିଲେ ଧନଜୀବନ ନଷ୍ଟ ହେବା ନେଇ ଆଶଙ୍କା ପ୍ରକାଶ ପାଇଛି । ଅନ୍ୟପଟେ ମନ୍ତେଇ ନଦୀରେ ମାଳ ମାଳ କୁମ୍ଭୀର ଥିବାରୁ ଗ୍ରାମବାସୀଙ୍କ ଜୀବନ ପ୍ରତି ବିପଦ ସୃଷ୍ଟି ହୋଇଛି ।
ମିଳିଥିବା ସୂଚନା ଅନୁଯାୟୀ, ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକର ଚରଦିଆ ପଞ୍ଚାୟତ ଦେଇ ପ୍ରବାହିତ ହୋଇଛି ମନ୍ତେଇ ନଦୀ । ନଦୀ ଠାରୁ ଗ୍ରାମ ଗୁଡିକୁ ସୁରକ୍ଷା ଦେବା ପାଇଁ ବନ୍ଧ ମଧ୍ୟ ତିଆରି ହୋଇଛି । କିନ୍ତୁ ରବିବାର ଚରଦିଆ ପଞ୍ଚାୟତ କନକପଲ୍ଲୀ ଗାଁ ଠାରେ ନଦୀ ବନ୍ଧ ଶହେ ଫୁଟ ଧସି ଯାଇଛି । ଫଳରେ ଆତଙ୍କିତ ହୋଇ ପଡ଼ିଛନ୍ତି ଅଞ୍ଚଳ ବାସୀ । ଚାନ୍ଦବାଲି ଜଳ ସମ୍ପଦ ବିଭାଗ ପକ୍ଷରୁ ପ୍ରତି ବର୍ଷ କୋଟି କୋଟି ଟଙ୍କା ଖର୍ଚ୍ଚ କରାଯାଇ ନଦୀ ବନ୍ଦ ସୁରକ୍ଷା ପାଇଁ ପଥର ପ୍ୟାକିଂ ସହ ରାସ୍ତା ନିର୍ମାଣ କରାଯାଉଛି । ହେଲେ ବିଭାଗ ପକ୍ଷରୁ ଠିକାଦାର ମାନଙ୍କ କାର୍ଯ୍ୟକୁ ସଠିକ ଭାବରେ ତଦାରଖ କରାଯାଉନାହିଁ ବୋଲି ଅଭିଯୋଗ ହୋଇଛି ।