ଭଦ୍ରକ: ଅବହେଳିତ ଅବସ୍ଥାରେ ଭଦ୍ରକ ଜିଲ୍ଲା ଅସୁରାଳି ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର । ନାହିଁନାହିଁରେ ଡାଲିଛି ଡାକ୍ତରଖାନା । ଏଠାରେ ନିୟମିତ ଡାକ୍ତର ନଥିବା ବେଳେ ଜଣେ ଅବସରପ୍ରାପ୍ତ ଡାକ୍ତର, ଜଣେ ଆୟୁଷ ଡାକ୍ତର, ଜଣେ ଅସ୍ଥାୟୀ ଷ୍ଟାଫ ନର୍ସ ଏବଂ ଜଣେ ଫାର୍ମାସିଷ୍ଟଙ୍କୁ ନେଇ ଚାଲିଛି ସ୍ଵାସ୍ଥ୍ୟ ସେବା । ତାହାବି ସକାଳ 8ଟା ରୁ ମଧ୍ୟାହ୍ନ 12 ଟା ଏବଂ ଅପରାହ୍ନ 3ଟା ରୁ 5 ଟା ପର୍ଯ୍ୟନ୍ତ । ଅନ୍ୟ ପକ୍ଷରେ ଏଠାରେ ଗର୍ଭବତୀମାନେ ମଧ୍ୟ କୌଣସି ସେବା ପାଇ ପାରୁ ନାହାନ୍ତି । ଏମିତିକି ମେଡିକାଲର ପାଚେରୀ ନଥିବାରୁ ରୋଗୀଙ୍କ ସମେତ ଏଠାରେ ଅସାମାଜିକ ବ୍ୟକ୍ତିଙ୍କ ଭିଡ଼ ଜମୁଛି । ଡାକ୍ତରଖାନାରେ ପାଚେରୀଟିଏ ପାଇଁ ୨୦୧୮ ନଭେମ୍ବର ୩ ତାରିଖରେ ଭିତ୍ତିପ୍ରସ୍ତର ସ୍ଥାପନ କରିଥିଲେ ତତ୍କାଳୀନ ବିଧାୟକ ମୁକ୍ତିକାନ୍ତ ମଣ୍ଡଳ । ଦୁର୍ଭାଗ୍ୟର କଥା ତାହା ଅଦ୍ୟାବଧି କାର୍ଯ୍ୟ ଆରମ୍ଭ ହୋଇପାରିଲା ନାହିଁ ।
ଅନ୍ୟ ପକ୍ଷରେ ପ୍ରସିଦ୍ଧ ଶୈବ କ୍ଷେତ୍ର ବାବା ଆଖଣ୍ଡଳମଣି ମନ୍ଦିରକୁ ଯାଇଥିବା 35 ନମ୍ବର ରାଜ୍ୟ ରାଜପଥ ପାର୍ଶ୍ଵରେ ଏହି ସ୍ବାସ୍ଥ୍ୟକେନ୍ଦ୍ରଟି ଅବସ୍ଥିତ । ଆଖପାଖ 7ଟି ପଞ୍ଚାୟତର ପ୍ରାୟ 30 ହଜାରରୁ ଅଧିକ ଲୋକେ ଏହି ଡାକ୍ତରଖାନା ଉପରେ ନିର୍ଭର କରନ୍ତି । ତେଣୁ ସଡକ ଦୁର୍ଘଟଣା ସହ ଅନ୍ୟାନ୍ୟ ଜରୁରୀକାଳୀନ ସେବା ପ୍ରଦାନ କରିବା ପାଇଁ ଏଠାରେ ସମସ୍ତ ସ୍ଵାସ୍ଥ୍ୟ ସେବା ପ୍ରଦାନ ସୁବିଧା ସୁଯୋଗ ଯୋଗାଇ ଦେବାକୁ ବାରମ୍ବାର ଦାବି ହେଉଛି । ଅନେକ ଥର ଦାବି ପରେ ଏବେ ଜିଲ୍ଲା ଧାମନଗର ବିଧାୟକ, ଜନସ୍ଵାସ୍ଥ୍ୟ ଅଧିକାରୀ, ସ୍ୱାସ୍ଥ୍ୟ ବିଭାଗର ଅଧିକାରୀ ଓ ଧାମନଗର ବିଧାୟକ ଅସୁରାଳି ସ୍ବାସ୍ଥ୍ୟକେନ୍ଦ୍ରକୁ ବୁଲି ଦେଖିଛନ୍ତି ।