ଭଦ୍ରକ: ସୂଚନା ଅଧିକାର ଆଇନ୍ ବଳରେ ରିଲିଫ ସମ୍ପର୍କିତ ତଥ୍ୟ ମାଗିବାରୁ ଗାଁରୁ ବାସନ୍ଦ କରାଯାଇଥିବା ଅଭିଯୋଗ ହୋଇଛି । ପଞ୍ଚାୟତ ଠାରୁ ଆରମ୍ଭ କରି ବ୍ଲକ ପ୍ରଶାସନକୁ ନ୍ୟାୟ ଭିକ୍ଷାକରି ବିଗତ 6 ମାସ ଧରି ନ୍ୟାୟ ପାଇଁ ଦୌଡିଦୌଡି ନୟାନ୍ତ ହେଲେଣି ହେଲେ ଗ୍ରାମବାସୀଙ୍କ ଆକ୍ରୋଶର ଶିକାର ହେଉଥିବା ଘଟଣା ଥମିବାରେ ନାଁ ଧରୁନାହିଁ । ନିରୁପାୟ ହୋଇ ଶେଷରେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ସପରିବାର ଓ ବନ୍ଧୁବାନ୍ଧବଙ୍କ ସହିତ ଅନଶନରେ ବସିବା ଲାଗି ଚେତାବନୀ ଦେଇଛନ୍ତି । ଏକେଉଁ ଉପାନ୍ତ ଅଞ୍ଚଳ ନୁହେଁ ବରଂ ସଭ୍ୟ ସମାଜର ସବୁ କ୍ଷେତ୍ରରେ ଅନ୍ୟ ଅଞ୍ଚଳ ସହିତ ସମକକ୍ଷ ହେଉଥିବା ଗାଁର ପ୍ରମୁଖ ପ୍ରସଙ୍ଗ । ଭଦ୍ରକ ଜିଲ୍ଲା ତିହିଡି ବ୍ଲକ ବାରସର ପଞ୍ଚାୟତ ଅଧିନ ନୂଆବନ୍ଧ ଗାଁର ଘଟିଛି ଏଭଳି ଅମାନବୀୟ ଘଟଣା ।
ସସ୍ମିତା ଦାସଙ୍କ ପରିବାରକୁ ଗାଁ ବାସନ୍ଦ ଅଥବା ଏକ ଘରିକିଆ କରାଯାଇଥିବା ଅଭିଯୋଗ ହୋଇଛି । ଗତ ସେପ୍ଟେମ୍ବର ମାସ ବନ୍ୟା ଜନିତ ରିଲିଫ ବଣ୍ଟନ ସମୟରେ ଆରମ୍ଭ ହୋଇଥିଲା ବିବାଦ । ଗାଁର ପ୍ରାୟ 90 ପରିବାର ଗୋଟିଏ ପାର୍ଶ୍ବରେ ରହି ସସ୍ମିତା ମଳିକଙ୍କ ପରିବାର ଉପରେ ଏକ ଘରିଆର ଆରୋପ କରାଯାଇଛି । ସରପଞ୍ଚଙ୍କ ନିକଟରେ ଗୁହାରି କରି ବିଫଳ ହେବାପରେ ବିଡିଓଙ୍କ ଦ୍ବାରସ୍ଥ ହୋଇଥିଲେ ଏହି ପରିବାର । ତେବେ ବିଡିଓଙ୍କ ନିର୍ଦ୍ଦେଶ ପରେ ତାଙ୍କୁ ମିଳିଥିଲା ରିଲିଫ ମାତ୍ର ପରେ ଗାଁର ଏକ ବୈଠକ ଜରିଆରେ ତାଙ୍କୁ ଏକଘରିଆ କରାଗଲା ବୋଲି କୁହାଯାଇଛି । ରିଲିଫ ପ୍ରଦାନରେ ଅନିୟମିତତା ହୋଇଥିବା ନେଇ ସୂଚନା ଅଧିକାର ଆଇନ ବଳରେ ରିଲିଫ ତଥ୍ୟ ମାଗିଥିଲେ । ସେବେଠାରୁ ଆରମ୍ଭ ହୋଇଛି ପରୋକ୍ଷ ନିର୍ଯାତନା । ସରକାରୀ ନଳକୂପ ଠାରୁ ଆରମ୍ଭ କରି ଧାନ ବିଲ, ଗାଁ ପଡିଆ, ପାନୀୟ ଜଳ ଯୋଗାଣ ଆଦି ବ୍ୟବହାର ସମୟରେ ଏହି ପରିବାରକୁ ଟାହି ଟାପରା କରାଯାଉଛି । ପରୋକ୍ଷରେ ନିବୃତ୍ତ ରହିବା ଲାଗି କୁହାଯାଉଛି । କେବଳ ସେତିକି ନୁହେଁ ଗାଁ ଦୋକାନରେ ତାଙ୍କୁ ସଉଦା ମନା କରାଯାଉଥିବାବେଳେ ଅନ୍ୟମାନେ ଏହି ପରିବାର ସହିତ କଥାବାର୍ତା ହେଲେ ସେମାନଙ୍କୁ ଜୋରିମାନା କରାଯିବ ବୋଲି ମଧ୍ୟ କୁହାଯାଉଛି । ଗାଁ ମୁଖିଆ ଏକ ଗ୍ରାମସଭା ଜରିଆରେ ଲୋକମାନଙ୍କୁ ଶିବମନ୍ଦିରରେ ନିୟମ କରାଇଥିବା ମଧ୍ୟ କୁହାଯାଉଛି। ଯାହାକୁ ନେଇ ଗତ 20/01/21 ରେ ଜିଲ୍ଲାପାଳଙ୍କ ନିକଟରେ ଅଭିଯୋଗ କରିଥିଲେ ସସ୍ମିତା । ତେବେ ତିହିଡି ବିଡିଓ ଓ ତହସିଲଦାର ଏହାର ତଦନ୍ତ କରି ବିହିତ ପଦକ୍ଷେପ ନେବାକୁ ଜିଲ୍ଲାପାଳ ଚିଠି କରିଥିଲେ। ଯାହାକୁ ନେଇ ବ୍ଲକ ପ୍ରଶାସନ ପକ୍ଷରୁ ବ୍ଲକ ସମାଜ ମଙ୍ଗଳ ସଂପ୍ରସାରଣ ଅଧିକାରୀ ଗାଁକୁ ଯାଇ ତଦନ୍ତ କରିଥିଲେ ।