ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର, ପାରିବାରିକ କଳହରୁ ହତ୍ୟା ସନ୍ଦେହ

ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର। ଭଦ୍ରକ ଜିଲ୍ଲା ବାସୁଦେବପୁର ବ୍ଲକ କୁମାରପୁର କାଁଥିପୁର ଆଡିଆ ଝାଉଁ ଜଙ୍ଗଲରୁ ଯୁବକଙ୍କ ମୃତଦେହ ଉଦ୍ଧାର କରାଯାଇଛି ।

ଭଦ୍ରକ: ଯୁବକଙ୍କ ଝୁଲନ୍ତା ମୃତଦେହ ଉଦ୍ଧାର। ଭଦ୍ରକ ଜିଲ୍ଲା ବାସୁଦେବପୁର ବ୍ଲକ କୁମାରପୁର କାଁଥିପୁର ଆଡିଆ ଝାଉଁ ଜଙ୍ଗଲରୁ ଯୁବକଙ୍କ ମୃତଦେହ ଉଦ୍ଧାର କରାଯାଇଛି। ମୃତ ଯୁବକ ସେହି ଗାଁର ବେଣୁଧର ମାଝୀଙ୍କ ପୁଅ କୈଳାଶ ମାଝୀ। ମଙ୍ଗଳବାର କିଛି ଲୋକ ସ୍ଥାନୀୟ ଜଙ୍ଗଲ ନିକଟକୁ ଶୌଚ ହେବାକୁ ଯାଇଥିବାବେଳେ ମୃତଦେହକୁ ଦେଖି ପୁଲିସ ଓ ପରିବାରକୁ ଖବର ଦେଇଥିଲେ।

ଖବର ଅନୁଯାୟୀ, କୈଳାଶ ବେଙ୍ଗାଲୁରୁରେ ରହି କାର୍ଯ୍ୟ କରୁଥିଲେ। ହେଲେ କୋରୋନା ପାଇଁ ସେ ଲକଡାଉନ ପୂର୍ବରୁ ଘରକୁ ଫେରିଥିଲେ। ଅନ୍ୟ ପକ୍ଷରେ ଜମିଜମାକୁ ନେଇ ପାରିବାରିକ ଗଣ୍ଡଗୋଳ ଲାଗି ରହୁଥିଲା। ସୋମବାର ମଧ୍ୟ ପାରିବାରିକ ଗଣ୍ଡଗୋଳ ହୋଇଥିଲା ବୋଲି ସୂଚନା ମିଳିଛି।

ତେବେ ମଙ୍ଗଳବାର ଝାଉଁ ଜଙ୍ଗଲରୁ କୈଳାଶର ମୃତଦେହ ଉଦ୍ଧାର ହେବା ବେଳେ ଏହା ହତ୍ୟା ନା ଆତ୍ମହତ୍ୟା ସେ ନେଇ ସ୍ପଷ୍ଟ ହୋଇନାହିଁ। ଘଟଣାସ୍ଥଳରେ ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି। ହେଲେ ଏହି ଘଟଣା ବାବଦରେ ପୁଲିସ ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ କରାଯାଇନାହିଁ।

ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ