ଭଦ୍ରକ:ଚାନ୍ଦବାଲିରେ ପହଞ୍ଚିଥିଲେ କ୍ୟାମେରାମ୍ୟାନ ମାନସ ସ୍ବାଇଁ ହତ୍ୟାକାଣ୍ଡର ଅଭିଯୁକ୍ତ ଶର୍ମିଷ୍ଠା, ଝୁନା, ନିରଞ୍ଜନ ଓ ରଞ୍ଜନ । ଏହି ବହୁ ଚର୍ଚ୍ଚିତ ହତ୍ୟାକାଣ୍ଡ ଘଟଣାରେ ସମ୍ପୃକ୍ତ 4 ଜଣ ଅଭିଯୁକ୍ତଙ୍କୁ 5 ଦିନିଆ ରିମାଣ୍ଡରେ ଆଣିଥିଲା କ୍ରାଇମବ୍ରାଞ୍ଚ । ଆଜି ରିମାଣ୍ଡ ଅବଧି ଶେଷ ହୋଇଛି । କ୍ରାଇମବ୍ରାଞ୍ଚ ଟିମ ଭଦ୍ରକ ସମସ୍ତ ଅଭିଯୁକ୍ତଙ୍କୁ କଟକ କ୍ରାଇମବ୍ରାଞ୍ଚ ଅଫିସକୁ ନେଇ ପଚରାଉଚରା କରୁଥିଲା । ତେବେ ପୁଣି ଶର୍ମିଷ୍ଠା ଓ ଝୁନାଙ୍କୁ ୫ ଦିନ ରିମାଣ୍ଡରେ ନେବାକୁ ଆବେଦନ କରିଥିଲା କ୍ରାଇମବ୍ରାଞ୍ଚ । ତେବେ କୋର୍ଟ ଆଉ ତିନି ଦିନ ରିମାଣ୍ଡରେ ନେବାକୁ ଅନୁମତି ଦେଇଛନ୍ତି ।
5 ଦିନ ଧରି ଅଭିଯୁକ୍ତଙ୍କୁ ମାରାଥନ ଜେରା କରାଯିବା ପରେ ହତ୍ୟାକାଣ୍ଡ ସମ୍ପର୍କିତ ବହୁ ତଥ୍ୟ ସାମ୍ନାକୁ ଆସିଥିବା ଜଣାପଡିଛି । ଜେରା କରିବା ସହ, ମାନସଙ୍କୁ ଅପହରଣ ହତ୍ୟା ଓ ତାଙ୍କ ମୃତଦେହକୁ ପୋତା ଯିବା ପର୍ଯ୍ୟନ୍ତ ସମସ୍ତ ଅପରାଧର ସିନ୍ ରିକ୍ରିଏସନ କରାଇଛି କ୍ରାଇମବ୍ରାଞ୍ଚ । ଏଥିପାଇଁ ଭଦ୍ରକ ଚାନ୍ଦବାଲି ଥାନା ପଳାଶପୁର ଠାରୁ ଆରମ୍ଭ କରି ଭୁବନେଶ୍ଵର ନୟାଗଡ ଜିଲ୍ଲା ରଣପୁର ଅଞ୍ଚଳର ବଢିପାଟଣା ଧାନ ବିଲରେ ମୃତଦେହ ପୋତା ଯାଇଥିବା ସ୍ଥାନ ପର୍ଯ୍ୟନ୍ତ କ୍ରାଇମ୍ ସିନ୍ ରିକ୍ରିଏସନ କରାଯାଇଛି ।