ଭଦ୍ରକ: ଜିଲ୍ଲାରେ ଏବେ ଦୈନିକ ବେଆଇନ ଦେଶୀ ମଦ, ଗଞ୍ଜେଇ ଏବଂ ବ୍ରାଉନ ସୁଗାର କାରବାର ବୃଦ୍ଧି ପାଉଥିବା ବେଳେ ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନାହିଁ । ସେପଟେ ଶାସକ ଦଳର ବିଧାୟକଙ୍କ ସହ ବ୍ରାଉନସୁଗାର ମାଫିଆଙ୍କ ଲିଙ୍କ ରହିଥିବା କଂଗ୍ରେସ ଅଭିଯୋଗ କରି ବିଧାୟକଙ୍କ ଇସ୍ତଫା ଦାବି କରିଛି ।
ବିଧାୟକଙ୍କ ସହ ବ୍ରାଉନସୁଗାର ମାଫିଆଙ୍କ ଲିଙ୍କ ଦର୍ଶାଇ ଇସ୍ତଫା ଦାବି କଲା କଂଗ୍ରେସ
ବ୍ରାଉନସୁଗାର କାରବାରରେ ଗିରଫ ହୋଇଥିବା ମାଫିଆଙ୍କ ସହ ଶାସକ ଦଳର ବିଧାୟକଙ୍କ ଫଟୋ ସାମାଜିକ ଗଣମାଧ୍ୟମରେ ଭାଇରାଲ ହୋଇଥିଲା । ଏଥିଲାଗି କଂଗ୍ରେସ ଜିଲ୍ଲା କାର୍ଯ୍ୟାଳୟଠାରେ ନଳିନୀ କାନ୍ତ ମହାନ୍ତିଙ୍କ ସଭାପତିତ୍ବରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଦଳ ପକ୍ଷରୁ ବିଧାୟକଙ୍କ ଇସ୍ତଫା ଦାବି କରିଛି । ଭଦ୍ରକ ସହରରେ ବେଆଇନ ନିଶା କାରବାର ଏକ ନିତିଦିନିଆ ଘଟଣା ହୋଇଯାଇଛି। ପୋଲିସ ଯେଉଁ ମାନଙ୍କୁ ଗିରଫ କରୁଛି ଓ ଗାଡି, ମୋବାଇଲ ଜବତ କରୁଛି, ସେ ସମ୍ପର୍କରେ ଅଧିକ ତଦନ୍ତ ହେଉ ନଥିବାରୁ ସେମାନଙ୍କ ପଛରେ କାହାର ହାତ ରହିଛି ତାହା ସ୍ପଷ୍ଟ ହୋଇପାରୁନାହିଁ ବୋଲି ଦଳ ଅଭିଯୋଗ କରିଛି ।