ଭଦ୍ରକ: ଡିସେମ୍ବର ୫ ତାରିଖରେ ୮ ଘଣ୍ଟିଆ ଭଦ୍ରକ ବନ୍ଦ ଡାକରା ଦେଲା ଭଦ୍ରକ ଜିଲ୍ଲା କଂଗ୍ରେସ । ଜିଲ୍ଲାରେ ସରକାରୀ ମେଡିକାଲ କଲେଜ ପ୍ରତିଷ୍ଠା ସହିତ ଭଦ୍ରକ ସ୍ବୟଂ ଶାସିତ ମହାବିଦ୍ୟାଳୟକୁ ବିଶ୍ଵବିଦ୍ୟାଳୟର ମାନ୍ୟତା ପ୍ରଦାନ ଦାବି କରିଛି ଭଦ୍ରକ ଜିଲ୍ଲା କଂଗ୍ରେସ । ଏନେଇ ବାରମ୍ବାର ଦାବି ପରେ ମଧ୍ୟ ସରକାର କିଛି ପଦକ୍ଷେପ ନେଉ ନଥିବାରୁ ଦଳ ତରଫରୁ ଭଦ୍ରକ ବନ୍ଦର ଆହ୍ବାନ ଦିଆଯାଇଛି ।
ଭଦ୍ରକ ଜିଲ୍ଲା ପ୍ରତି ରାଜ୍ୟ ସରକାର ଅବହେଳା କରିଥିବା କଂଗ୍ରେସ ଅଭିଯୋଗ କରିଛି । ପୂର୍ବରୁ ଭଦ୍ରକ ଜିଲ୍ଲାରେ ଗୋଟିଏ ସରକାରୀ ମେଡିକାଲ କଲେଜ ପ୍ରତିଷ୍ଠା କରିବାକୁ ଦାବି ହୋଇଥିଲା । ଭଦ୍ରକ ସ୍ବୟଂ ଶାସିତ ମହାବିଦ୍ୟାଳୟକୁ ବିଶ୍ଵବିଦ୍ୟାଳୟର ମାନ୍ୟତା ପ୍ରଦାନ ପାଇଁ ମଧ୍ୟ ଅନେକ ଥର ଦାବି ହୋଇଛି । କିନ୍ତୁ ରାଜ୍ୟ ସରକାର ଏ ଦିଗରେ କୌଣସି ପଦକ୍ଷେପ ନେଉ ନଥିବାରୁ ଏହା ବିରୋଧରେ ଆନ୍ଦୋଳନ କରିବାକୁ କଂଗ୍ରେସ ସ୍ଥିର କରିଛି । ଆସନ୍ତା ଡିସେମ୍ବର ୫ ତାରିଖ ଦିନ ସକାଳ ୬ ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ୮ ଘଣ୍ଟିଆ ଭଦ୍ରକ ବନ୍ଦର ଆହ୍ବାନ ଦିଆଯାଇଛି । ଏଥିପାଇଁ ଭଦ୍ରକ କଂଗ୍ରେସ ପକ୍ଷରୁ ଜିଲ୍ଲାପାଳଙ୍କ ଅବଗତି ପାଇଁ ଏକ ପତ୍ର ପ୍ରଦାନ କରାଯାଇଛି ।