ଭଦ୍ରକ: ଆଜି ବିଜେପି ପକ୍ଷରୁ 6 ଗୋଟି ଦାବି ନେଇ ଏନଏସି ଅଫିସ ଘେରିବା ସହ ଏନଏସି ଅଧିକାରୀଙ୍କୁ ଦାବିପତ୍ର ପ୍ରଦାନ କରାଯାଇଛି । ଚାନ୍ଦବାଲି ଏନଏସିରେ ଦୀର୍ଘଦିନ ହେବ ଲାଗିରହିଥିବା ମୌଳିକ ସମସ୍ୟା ପାନୀୟଜଳ ସମସ୍ୟା ଓ ଡ୍ରେନେଜ ବ୍ୟବସ୍ଥାରେ ସୁଧାର ଆଣିବା ସହ ପ୍ରଧାନମନ୍ତ୍ରୀ ଆବାସ ଯୋଜନାରେ ବ୍ୟାପକ ଭାବେ ହେରଫେର ହେଉଥିବା ଅଭିଯୋଗ ହୋଇଛି ।
ତେବେ ଶାସକ ଦଳ ଦଳୀୟ କୋଟାରେ ବାସ୍ତବ ହିତାଧିକାରୀଙ୍କୁ ନଦେଇ ଅଯୋଗ୍ୟ ହିତାଧିକାରୀ ଓ ଦଳୀୟ କର୍ମୀଙ୍କୁ କାର୍ଯ୍ୟାଦେଶ ବଣ୍ଟନ କରାଯାଉଥିବା ଅଭିଯୋଗ ହୋଇଛି । ଏଥିସହ ଚାନ୍ଦବାଲି ଏନଏସିରେ ଆଲୋକୀକରଣ ଓ ରାସ୍ତାଘାଟରେ ନିମ୍ନମାନର କାର୍ଯ୍ୟ କରାଯାଇଥିବା ବିଜେପି ଅଭିଯୋଗ କରିଛି । ଚାନ୍ଦବାଲି ଏନଏସିରେ ପ୍ରତିଟି ବିକାଶମୂଳକ କାର୍ଯ୍ୟରେ ଶାସକ ଦଳ ଏନଏସି ଅଧିକାରୀଙ୍କୁ ଚାପରେ ରଖି ବ୍ୟାପକ ଅନିୟମିତତା କାର୍ଯ୍ୟ କରୁଛନ୍ତି ବୋଲି ବିଜେପିର ଅଭିଯୋଗ ରହିଛି ।
ତେବେ ଏଭଳି କାମ ଯେଭଳି ଆଗାମୀ ଦିନରେ ପୁନରାବୃତ୍ତି ନହୁଏ ଏଥିନେଇ ଏକ ବିରାଟ ଜନ ଆନ୍ଦୋଳନ କରାଯିବ ବୋଲି ଦଳ ଚେତାବନୀ ଦେଇଛି ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ