ମହୁରଳ ଆକ୍ରମଣରେ ଶିଶୁକନ୍ୟାର ମୃତ୍ୟୁ

ମହୁରଳ ଆକ୍ରମଣରେ ବାସୁଦେବପୁର ବ୍ଲକ ପାରାପୋଖରୀ ଗ୍ରାମର ଗଣେଶ ବିଶ୍ବାଳଙ୍କ ଝିଅ ସାବିତ୍ରୀ ବିଶ୍ବାଳଙ୍କ ମୃତ୍ୟୁ ଘଟିଛି ।

ଭଦ୍ରକ: ମହୁରଳ ଆକ୍ରମଣରେ ଜଣେ 5 ବର୍ଷର ନାବାଳିକା ଶିଶୁକନ୍ୟାର ମୃତ୍ୟୁ ଘଟିଛି। ଏଭଳି ଦୁଃଖଦ ଘଟଣା ଘଟିଛି ବାସୁଦେବପୁର ବ୍ଲକ ପାରାପୋଖରୀ ଗ୍ରାମରେ। ମୃତ ନାବାଳିକା ଜଣଙ୍କ ପାରାପୋଖରୀ ଗ୍ରାମର ଗଣେଶ ବିଶ୍ବାଳଙ୍କ ଝିଅ ସାବିତ୍ରୀ ବିଶ୍ବାଳ।

ସୂଚନା ଅନୁଯାୟୀ, ସାବିତ୍ରୀ ଘର ଆଗରେ ଖେଳୁଥିବା ବେଳେ କିଛି ମହୁରାଳ ପୋକ ତାଙ୍କୁ ଆକ୍ରମଣ କରିଥିଲେ। ଏହାପରେ ପରିବାର ଲୋକ ତାଙ୍କୁ ଘରୋଇ ଚିକିତ୍ସା କରିଥିଲେ। ଫଳରେ ସାବିତ୍ରୀ ଯନ୍ତ୍ରଣାରୁ ସାମାନ୍ୟ ଆରୋଗ୍ୟ ଲାଭ କରିଥିଲା ।

କିଛି ସମୟ ପରେ ସାବିତ୍ରୀର ଅବସ୍ଥା ପୁଣି ଗୁରୁତର ହେବାରୁ ତାଙ୍କୁ ବାସୁଦେବପୁର ମେଡିକାଲକୁ ଆଣାଯାଇଥିଲା। ମାତ୍ର ସେଠାରେ ଡାକ୍ତର ତାକୁ ମୃତ ଘୋଷଣା କରିଥିଲେ।

ଭଦ୍ରକରୁ ଦେବାଶିଷ୍ ମହାପାତ୍ର, ଇଟିଭି ଭାରତ