ଭଦ୍ରକ: ଗ୍ରାମାଞ୍ଚଳ ଥାନା ପୋଲିସକୁ ସଫଳତା । ବିପୁଳ ପରିମାଣରେ ବ୍ରାଉନ ସୁଗାର ଜବତ କଲା ଭଦ୍ରକ ଗ୍ରାମାଞ୍ଚଳ ଥାନା ପୋଲିସ । 12.25 ଗ୍ରାମ ଓଜନର ବ୍ରାଉନ ସୁଗର ଜବତ ସହିତ ୨ ଜଣଙ୍କୁ ଗିରଫ କରାଯାଇଛି । ଗିରଫ ହୋଇଥିବା ଦୁଇ ଜଣ ଯୁବକ ହେଉଛନ୍ତି ପଡୋଶୀ ଯାଜପୁର ଜିଲ୍ଲାର ଶ୍ୟାମ ସୁନ୍ଦର ଜେନା ଏବଂ ପ୍ରତାପ ଜେନା ବୋଲି ଜଣାପଡିଛି । ପୋଲିସ ପାଟ୍ରୋଲିଂ କରୁଥିବା ବେଳେ ବ୍ରାଉନ ସୁଗାର ଜବତ କରିଥିବା ପୋଲିସ ପକ୍ଷରୁ ସୂଚନା ଦିଆଯାଇଛି ।
ସୂଚନା ଅନୁଯାୟୀ, ଭଦ୍ରକ ଜିଲ୍ଲା ଦେଇ ଯାଇଥିବା 16 ନମ୍ବର ଜାତୀୟ ରାଜପଥର ରାହାଞ୍ଜ ଛକ ନିକଟରେ ପୋଲିସ ପକ୍ଷରୁ ପାଟ୍ରୋଲିଂ ଚାଲିଥିଲା । ସେହି ସମୟରେ ଗୋଟିଏ ବାଇକରେ ୨ ଜଣ ଯୁବକ ବାଲେଶ୍ବରରୁ ଯାଜପୁର ଆଡକୁ ଯାଉଥିଲେ । ପୋଲିସ ସେମାନଙ୍କୁ ସନ୍ଦେହ କରି ଅଟକାଇବାକୁ ଚେଷ୍ଟା କରିଥିଲା । ହେଲେ ପୋଲିସ ଅଟକାଉଥିବା ଦେଖି ଦ୍ରୁତ ଗତିରେ ସେମାନେ ବାଇକ ନେଇ ଖସି ପଳାଉଥିବା ବେଳେ ଗ୍ରାମାଞ୍ଚଳ ଥାନା ପୋଲିସ ଦୁଇ ଯୁବକଙ୍କୁ ଗୋଡ଼ାଇ ଧରିଥିଲା । ପରେ ୨ ଜଣ ଯୁବକଙ୍କୁ ଚେକିଂ କରିବାରୁ ତାଙ୍କ ନିକଟରୁ 12.25 ଗ୍ରାମ ଓଜନର ବ୍ରାଉନ ସୁଗାର ବାହାରି ଥିଲା । ପରେ ସେମାନଙ୍କୁ ଥାନାକୁ ନେଇ ଅଧିକ ତଦନ୍ତ ଆରମ୍ଭ କରିଥିଲା ପୋଲିସ ।
ତେବେ ତଦନ୍ତ ସମୟରେ ଏହି ଦୁଇ ଜଣ ନିଶା ମାଫିଆ ଅନେକ ଦିନ ଧରି ଏହି କାରବାର କରୁଥିଲେ ବୋଲି ଜାଣିବାକୁ ପାଇଛି ପୋଲିସ । ତେଣୁ ଏହି କାରବାର ପାଇଁ ସେମାନେ ବିଭିନ୍ନ ସ୍ଥାନରେ ସେମାଙ୍କର ନେଟୱାର୍କ ସ୍ଥାପନ କରିଥିବା ନେଇ ଜଣାପଡିଛି । ଅନ୍ୟପଟେ ସେମାନଙ୍କ ନିକଟରୁ ଗୋଟିଏ ବାଇକ ଏବଂ ତିନୋଟି ମୋବାଇଲ ଫୋନକୁ ଜବତ କରିଛି ଭଦ୍ରକ ଗ୍ରାମାଞ୍ଚଳ ଥାନା ପୋଲିସ । ସେମାନଙ୍କ ଠାରୁ ଜବତ ହୋଇଥିବା ମୋବାଇଲ ଫୋନରୁ ମିଳିଥିବା ତଥ୍ୟକୁ ଭିତ୍ତି କରି ପୋଲିସ ପକ୍ଷରୁ ଏନେଇ ଅଧିକ ତଦନ୍ତ ଜାରି ରହିଥିବା ସୂଚନା ମିଳିଛି ।