ମଧ୍ୟାହ୍ନ ଭୋଜନ ଖାଇ 19 ଛାତ୍ରଛାତ୍ରୀ ଅସୁସ୍ଥ, ଚିକିତ୍ସା ପରେ ସ୍ବାସ୍ଥ୍ୟବସ୍ଥା ସ୍ଥିର

ଗୁରୁବାର ମଧ୍ୟାହ୍ନ ଭୋଜନ ଖାଇ ଭଦ୍ରକର ତିହିଡି ବ୍ଲକ ଅଧିନସ୍ଥ ଚାରିତରଫା ୟୁଜି ୟୁପି ବିଦ୍ୟାଳୟର 19 ଜଣ ଛାତ୍ରଛାତ୍ରୀଙ୍କ ଅସୁସ୍ଥ ହୋଇଛନ୍ତି । ଆଜି ସକାଳେ ସେମାନଙ୍କ ସ୍ବାସ୍ଥ୍ୟାବସ୍ଥା ଖରାପ ହେବାରୁ ତାଙ୍କୁ ଚିକିତ୍ସା ପାଇଁ ଭଦ୍ରକ ମେଡିକାଲରେ ଭର୍ତ୍ତି କରାଯାଇଥିଲା । ଏବେ ସେମାନଙ୍କ ସ୍ବାସ୍ଥ୍ୟାବସ୍ଥା ସ୍ଥିର ଥିବା ସୂଚନା ରହିିଛି ।

ଭଦ୍ରକ: ଭଦ୍ରକ ତିହିଡି ବ୍ଲକ ଚାରିତରଫା ୟୁଜି ୟୁପି ବିଦ୍ୟାଳୟରେ ଅଘଟଣ । ମଧ୍ୟାହ୍ନ ଭୋଜନ ଖାଇ 19 ଜଣ ଛାତ୍ରଛାତ୍ରୀ ଅସୁସ୍ଥ ହୋଇଛନ୍ତି । ଅସୁସ୍ଥ ଛାତ୍ରଛାତ୍ରୀଙ୍କୁ ଚିକିତ୍ସା ପାଇଁ ଭଦ୍ରକ ମେଡିକାଲରେ ଭର୍ତ୍ତି କରାଯାଇଛି ।

ଗତକାଲି ୟୁଜି ୟୁପି ବିଦ୍ୟାଳୟର ଛାତ୍ରଛାତ୍ରୀ ମଧ୍ୟାହ୍ନ ଭୋଜନ ଖାଇଥିଲେ । କିଛି ଛାତ୍ରଛାତ୍ରୀ ମଧ୍ୟାହ୍ନ ଭୋଜନ ଖାଇବା ପରେ ଭାତରେ ମୂଷା ପଡିଥିବା ଦେଖିଥିଲେ । ଫଳରେ ଅବଶିଷ୍ଟ ଖାଦ୍ୟକୁ ଆଉ କେହି ଖାଇନଥିଲେ । ହେଲେ ଆଜି ସକାଳେ 19 ଜଣ ଛାତ୍ରଛାତ୍ରୀଙ୍କ ପେଟ କାଟିବାକୁ ଲାଗିଥିଲା । ପିଲାମାନେ ଅସୁସ୍ଥ ହେଉଥିବା ଦେଖି ସ୍କୁଲ ଶିକ୍ଷକ ଓ ଅଭିଭାବକ ସେମାନଙ୍କୁ ଭଦ୍ରକ ଡାକ୍ତରଖାନାରେ ଭର୍ତ୍ତି କରାଇଥିଲେ । ଚିକିତ୍ସା ପରେ ଛାତ୍ରଛାତ୍ରୀଙ୍କ ଅବସ୍ଥା ସ୍ଥିର ଥିବା ଜଣାପଡିଛି ।

ସେପଟେ ମେଡିକାଲରେ ଭଦ୍ରକ ଉପଜିଲ୍ଲାପାଳ ପହଞ୍ଚି ଛାତ୍ରଛାତ୍ରୀଙ୍କ ସ୍ବାସ୍ଥ୍ୟବସ୍ଥା ସମ୍ପର୍କରେ ପଚାରି ବୁଝିଥିଲେ । ତଦନ୍ତ ପରେ ଘଟଣାର ସତ୍ୟାତା ଜଣାପଡିବ ବୋଲି ଉପଜିଲ୍ଲାପାଳ କହିଛନ୍ତି ।

ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ