ଭଦ୍ରକ:ଗ୍ରାମାଞ୍ଚଳ ଥାନା ପୋଲିସକୁ ସଫଳତା । ବିପୁଳ ପରିମାଣରେ ବ୍ରାଉନସୁଗାର ଜବତ କଲା ଭଦ୍ରକ ଗ୍ରାମାଞ୍ଚଳ ଥାନା ପୋଲିସ । ୧୧୮ ଗ୍ରାମର ବ୍ରାଉନସୁଗାର ଜବତ କରି ଜଣଙ୍କୁ ଗିରଫ କରାଯାଇଛି । ଅଭିଯୁକ୍ତ ଜଣକ ଚରମ୍ପା ବାଘମରା ଅଞ୍ଚଳର ଚଗୁଲୁ ମଲ୍ଲିକଙ୍କ ପୁଅ ଚନ୍ଦନ ମଲ୍ଲିକ ବୋଲି ଜଣାପଡିଛି । ପୋଲିସ ପାଟ୍ରୋଲିଂ କରୁଥିବା ବେଳେ ବ୍ରାଉନସୁଗାର ଜବତ କରିଥିବା ପୋଲିସ ପକ୍ଷରୁ ସୂଚନା ଦିଆଯାଇଛି ।
ସୂଚନା ଅନୁଯାୟୀ, ଭଦ୍ରକ ଜିଲ୍ଲା ଦେଇ ଯାଇଥିବା ୧୬ ନମ୍ବର ଜାତୀୟ ରାଜପଥ ଚରମ୍ପାସ୍ଥିତ ରମ୍ବିଳା ଛକ ନିକଟରେ ପୋଲିସ ପକ୍ଷରୁ ପାଟ୍ରୋଲିଂ ଚାଲିଥିଲା । ସେହି ସମୟରେ ବାଲେଶ୍ଵର ଆଡୁ ଦୁଇ ଜଣ ଯୁବକ ଏକ ବାଇକ ଯୋଗେ ଭଦ୍ରକ ଆସୁଥିଲେ । ପୋଲିସ ସେମାନଙ୍କୁ ସନ୍ଦେହ କରି ଅଟକାଇବାକୁ ଚେଷ୍ଟା କରିଥିଲା। ପୋଲିସ ଅଟକାଉଥିବା ଦେଖି ଦ୍ରୁତ ଗତିରେ ସେମାନେ ବାଇକ ନେଇ ଖସି ପଳାଉଥିବା ବେଳେ ଗ୍ରାମାଞ୍ଚଳ ଥାନା ପୋଲିସ ଜଣେ ଯୁବକକୁ ଗୋଡ଼ାଇ ଧରିଥିଲା । ହେଲେ ଅନ୍ୟ ଜଣେ ଖସି ପଳାଇବା ପାଇଁ ସକ୍ଷମ ହୋଇଥିଲା। ପରେ କାବୁ ହୋଇଥିବା ଯୁବକକୁ ତଦନ୍ତ କରିବାରୁ ତା ନିକଟରୁ 118 ଗ୍ରାମ ଓଜନର ବ୍ରାଉନ ସୁଗର ବାହାରି ଥିଲା। ଯାହାର ଆନୁମାନିକ ବଜାର ମୂଲ୍ୟ 17 ଲକ୍ଷ ଟଙ୍କା ହେବ ବୋଲି ପୋଲିସ ପକ୍ଷରୁ ପ୍ରକାଶ କରାଯାଇଛି।