ବରଗଡ଼:ଜିଲ୍ଲାର ପ୍ରସିଦ୍ଧ ବରପାଲି ଶୀତଳଷଷ୍ଠୀ ଯାତ୍ରା କମିଟି ପକ୍ଷରୁ ଆୟୋଜିତ ହୋଇଯାଇଛି ମହାନ ୧୪୫ତମ ଶିବପାର୍ବତୀ ବିବାହ ମହୋତ୍ସବ । ଏହି ଉତ୍ସବରେ ଆଦ୍ୟପର୍ବ ଥାଳଉଠା ପର୍ବ ଓ ଭକ୍ତ ମାନଙ୍କ ବ୍ରତଧାରଣ କାର୍ଯ୍ୟକ୍ରମ ରୀତିନୀତି ମଧ୍ୟରେ ଆଜି(ମଙ୍ଗଳବାର) ସମାପନ ହୋଇଛି । ମଙ୍ଗଳବାର ପୂର୍ବାହ୍ନରେ ମନ୍ଦିର ପରିସରରେ ବିଧି ଅନୁସାରେ ମହାପ୍ରଭୁ କପିଳେଶ୍ବର ବାବାଙ୍କ ପୂଜାର୍ଚ୍ଚନା ଓ ରୁଦ୍ରାଭିଷେକ ହୋଇଥିଲା । ପଣ୍ଡିତ ହେମନ୍ତ ମିଶ୍ର ପୂଜା କାର୍ଯ୍ୟ ସମ୍ପାଦନ କରିଥିଲେ ।
ଅପରାହ୍ନରେ ପବିତ୍ର ଅକ୍ଷୟ ତୃତୀୟା ତିଥିରେ ପ୍ରତିବର୍ଷ ପରି ପରମ୍ପରା ଭିତ୍ତିକ ଭାବରେ ଯାତ୍ରା କମିଟି ବରପକ୍ଷ ଓ ଜଗନ୍ନାଥ ନଗର କନ୍ୟାପକ୍ଷ ଶୈବ ଭକ୍ତମଣ୍ଡଳୀ ସ୍ଥାନୀୟ ନୃପରାଜ କ୍ଲବ ପରିସରରୁ ଶୋଭାଯାତ୍ରା ବାହାରି ରାଜବାଟୀ ମିଶ୍ରପଡା ପଡ଼ା ହୋଇ ବାବା କପିଳେଶ୍ବର ଶିବମନ୍ଦିର ପ୍ରାଙ୍ଗଣରେ ପହଞ୍ଚିଥିଲେ । ପରେ କପିଳେଶ୍ବର ବାବାଙ୍କ ପକ୍ଷରୁ ଯାତ୍ରା କମିଟି ଓ ପାର୍ବତୀ ମାତାଙ୍କ ପିତ୍ରୁଆଳୟରୁ ଆସିଥିବା ଜଗନ୍ନାଥ ନଗରବାସୀଙ୍କ ମଧ୍ୟରେ ପ୍ରଥା ଅନୁଯାୟୀ ବାବା ଓ ମାତାଙ୍କ ପୂଜାର୍ଜନା ହୋଇ ସମସ୍ତ ପାଳନୀୟ ରୀତିକାନ୍ତି କରାଯାଇଥିଲା ।