ବରଗଡ: ସ୍ପଷ୍ଟ ଦିବାଲୋକରେ ଓଡିଶାର ସମ୍ପତ୍ତି ଚୋରି କରୁଛି ଛତିଶଗଡ଼ । ସବୁକିଛି ଜିଲ୍ଲା ପ୍ରଶାସନର ନାକ ତଳେ ହେଉଛି । ସ୍ଥାନୀୟ ପ୍ରଶାସନ ଏହାକୁ ରୋକିବା ବଦଳରେ କିଛି ହାତଗୁଞ୍ଜା ନେଇ କଥା ରଫାଦଫା କରୁଛି ବୋଲି ଅଭିଯୋଗ ହୋଇଛି । ସେପଟେ ବେଆଇନ ବାଲିଚାଲାଣ ନେଇ ବହୁବାର ଆପତ୍ତି ଉଠାଇଛନ୍ତି ସ୍ଥାନୀୟ ଲୋକେ । ମାତ୍ର ବାଡ ଯଦି ଫସଲ ଖାଏ, ଗୁହାରୀ କରିବ କାହାକୁ ।
ପଡୋଶୀ ଛତିଶଗଡର ବାଲି ମାଫିଆ ଓ ସ୍ଥାନୀୟ ସରକାରୀ କଳର ପ୍ରିୟାପ୍ରିତି ଚାଲିଛି । ଫଳରେ ଓଡିଶା କୋଟି କୋଟି ଟଙ୍କାର ରାଜସ୍ବ ହରାଉଛି । ଓଡିଶା ସୀମାନ୍ତରେ ଥିବା ବରଗଡ ଜିଲ୍ଲାରୁ ଭୂ-ସମ୍ପତ୍ତି ସବୁ ଛତିଶଗଡକୁ ବେଆଇନ ଭାବେ ପଠାଯାଉଥିବା ଅଭିଯୋଗ ହୋଇଛି । ମାତ୍ର ଆଶ୍ଚର୍ଯ୍ୟର କଥା ସ୍ଥାନୀୟ ପୋଲିସ, ତହସିଲଦାର ଓ ଉପଜିଲ୍ଲାପାଳ ସମସ୍ତେ ନିରବଦ୍ରଷ୍ଟା । ନିଜର ପକେଟ ଗରମ କରିବାକୁ ସାଗ ମାଛଦରରେ, ପ୍ରତ୍ୟେକ ଟ୍ରାକ୍ଟର ଠାରୁ ଟ୍ରିପ ପିଛା ୩୦୦ରୁ 3000 ଟଙ୍କା ନିଆଯାଉଥିବା କୁହାଯାଉଛି । ଏହିପରି ଭାବରେ ବର୍ଷକୁ ପ୍ରାୟ ୧୧ ଲକ୍ଷରୁ ଅଧିକ ଟଙ୍କା ଆଦାୟ ହୋଇଥାଏ । ତେବେ ସବୁତକ ସ୍ଥାନୀୟ ବାବୁମାନଙ୍କ ପକେଟକୁ ଚାଲିଯାଏ । ବାଲି ଚୋରା ଚାଲାଣ ଘଟଣା ସାରା ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି । ମାତ୍ର ବରଗଡ ଜିଲ୍ଲା ପ୍ରଶାସନ ଯେମିତି ଏ ଘଟଣାରେ ଆଖି ବୁଜିଦେଇଛି ।