ବରଗଡ: ଜିଲ୍ଲା ପଦ୍ମପୁର ଉପଖଣ୍ଡ ଅଞ୍ଚଳରେ ଆଜି ମଧ୍ୟ ଏପରି ଗାଁ ରହିଛି ଯେଉଁଠିକୁ ଗମନାଗମନ ପାଇଁ ଭଲ ରାସ୍ତାଟିଏ ମଧ୍ୟ ନାହିଁ । ଗ୍ରାମବାସୀ ବର୍ଷା ଦିନେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥାନ୍ତି । ଅଳ୍ପ ବର୍ଷା ହୋଇଗଲେ ସାଇକେଲ-ବାଇକ ତ ଦୂରର କଥା ଚାଲି ଚାଲି ଯାତାୟତ କରିବା କଷ୍ଟକର ହୋଇପଡ଼େ।
ଭିଡିଓ ସୌଜନ୍ୟ- ସମ୍ବାଦଦାତା, ବରଗଡ
ଜଗଦଲପୁର ଥାନା ଅନ୍ତର୍ଗତ ଚିରୋଲି ଗ୍ରାମରେ ପାଖାପାଖି ୨୦୦ ରୁ ଅଧିକ ପରିବାର ବସବାସ କରୁଥିବା ବେଳେ ଏଠାକାର ଗ୍ରାମବାସୀ ଶିକ୍ଷା, ସ୍ୱାସ୍ଥ୍ୟ ଓ ଖାଦ୍ୟପେୟ ପାଇଁ ପ୍ରତିଦିନ ଜଗଦଲପୁର ଉପରେ ନିର୍ଭର କରିଥାନ୍ତି । ପିଲାମାନେ ପାଠ ପଢିବା ପାଇଁ ଜଗଦଲପୁର ସ୍ଥିତ ବିଦ୍ୟାଳୟକୁ ଯାଇଥାନ୍ତି । ଚିକିତ୍ସା ପାଇଁ ଜଗଦଲପୁର ଡାକ୍ତରଖାନା ଉପରେ ନିର୍ଭର କରନ୍ତି ଏଠାକାର ଲୋକେ । କିନ୍ତୁ ଏହି ଗ୍ରାମକୁ ଥିବା ଏକମାତ୍ର ରାସ୍ତା ଅତି ଶୋଚନୀୟ ହୋଇ ପଡିଛି । ଏହି ଗ୍ରାମକୁ ଆମ୍ବୁଲାନ୍ସ ଗୋଟେ ଯିବାକୁ ମଧ୍ୟ ରାସ୍ତା ନାହିଁ । ଗର୍ଭବତୀ ମହିଳା ମାନଙ୍କୁ ଚିକିତ୍ସା ପାଇଁ ନେବା ଆଣିବା ବହୁ କଷ୍ଟକର ହୋଇପଡିଛି ।