ବରଗଡ଼: ଆସନ୍ତା ଡିସେମ୍ବର 31ତାରିଖରୁ ଆରମ୍ଭ ହେବ 71 ତମ ବିଶ୍ଵ ପ୍ରସିଦ୍ଧ ଧନୁଯାତ୍ରା। ଡିସେମ୍ବର 31ରୁ ଜାନୁଆରୀ 10 ତାରିଖ ପର୍ଯ୍ୟନ୍ତ 11 ଦିନ ଧରି ଖୋଲା ମଞ୍ଚରେ ଅଭିନୀତ ହେବ ପୌରାଣିକ କଥା ବସ୍ତୁଉପରେ ଆଧାରିତ ଧନୁଯାତ୍ରାର ଭିନ୍ନ ଭିନ୍ନ ଦୃଶ୍ୟ। ନାଟକକୁ ଜୀବନ୍ତ ଓ ଚିତ୍ତାକର୍ଷକ କରିବା ପାଇଁ ମଙ୍ଗଳବାର ଠାରୁ ଆରମ୍ଭ ହୋଇଯାଇଛି ଅଭ୍ୟାସ ଆଖଡ଼ା।
ସୋମବାର ଅତିରିକ୍ତ ଜିଲ୍ଲାପାଳ ମିର୍ଦ୍ଧା ଟପ୍ପୋ ସ୍ଥାନୀୟ କଲ୍ୟାଣ ମଣ୍ଡପ ଠାରେ ଏହି ଆଖଡ଼ା ଶାଳାର ଶୁଭାରମ୍ଭ କରିଥିଲେ । ମାଁ ସରସ୍ଵତୀଙ୍କ ଫଟୋରେ ମାଲ୍ୟାର୍ପଣ ଓ ପୂଜା କରିବା ପରେ ଆଖଡ଼ା ଶାଳରେ ଆଭ୍ୟାସ ଆରମ୍ଭ କରାଯାଇଥିଲା । ମହାରାଜା କଂସ ଭୂମିକାରେ ତୃତୀୟ ବର୍ଷ ପାଇଁ ଅଭିନୟ କରୁଥିବା ଭୁବନେଶ୍ବର ପ୍ରଧାନଙ୍କ ସମେତ ସମସ୍ତ କଳାକାର ଏବର୍ଷ ଆହୁରି ଭଲ ପ୍ରଦର୍ଶନ କରିବା ପାଇଁ ନିଜର ଅଭ୍ୟାସ ଜାରି ରଖିଛନ୍ତି।
ଧନୁଯାତ୍ରାର ମୁଖ୍ୟ ଆକର୍ଷଣ ମହାରାଜ କଂସ ହୋଇଥିବା ବେଳେ ଚଳିତ ବର୍ଷ ପ୍ରଥମ ଥର ପାଇଁ ବିଶ୍ଵ ଦରବାରରେ କଂସ ଅଭିନୟ କରୁଥିବା ଭୁବନେଶ୍ବର ପ୍ରଧାନଙ୍କ ସହିତ ସମସ୍ତ ମନ୍ତ୍ରୀ, ମହାମନ୍ତ୍ରୀ, ପାରିଷଦ ବର୍ଗଙ୍କୁ ନେଇ ଆରମ୍ଭ ହୋଇଛି ଆଖଡ଼ା। ନାଟ୍ୟ ଗୁରୁ ଅଶୋକ ବେହେରାଙ୍କ ନିର୍ଦ୍ଦେଶନା କ୍ରମେ ସମସ୍ତ କଳାକାର ନିଜ ନିଜର ଅଭିନୟର ଅଭ୍ୟାସ କରୁଛନ୍ତି। ଦର୍ଶକଙ୍କୁ ନୂଆ କିଛି ସଂଳାପ ଓ ଅଟ୍ଟହାସ୍ୟର ଭେଟି ଦେବା ପାଇଁ ନୂତନ ପ୍ରୟାସ ଚଲାଇଛନ୍ତି ନିର୍ଦ୍ଦେଶକ ଅଶୋକ ବେହେରା।
ଧନୁଯାତ୍ରା ପାଇଁ ଅଭ୍ୟାସ ଆଖଡ଼ା ଆରମ୍ଭ ଧନୁଯାତ୍ରାର ମୁଖ୍ୟ ଆକର୍ଷଣ ମହାରାଜ କଂସ ହୋଇଥିଲେ ସୁଦ୍ଧା ପାର୍ଶ୍ଵ କଳାକାରଙ୍କ ରହିଛି ବହୁ ଗୁରୁତ୍ବପୂର୍ଣ୍ଣ ଭୂମିକା। ସେମାନଙ୍କ ବିନା ଧନୁଯାତ୍ରାର ନାଟକ ଅସମ୍ପୂର୍ଣ୍ଣ। ଆଉ କିଛିଦିନ ପରେ ବରଗଡ଼ ପାଲଟିଯିବ ମଥୁରା ନଗରୀ ଓ ଅମ୍ବାପାଲି ହେବ ଗୋପପୁର ଏବଂ ଏହି ଖୋଲା ରଙ୍ଗମଞ୍ଚରେ ସମସ୍ତ ବରଗଡ଼ବାସୀ ପାଲଟି ଯିବେ ଜଣେ ଜଣେ କଳାକାର।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
