ବରଗଡ:ବିଶ୍ବ ପ୍ରସିଦ୍ଧ ବରଗଡ଼ ଧନୁଯାତ୍ରା ପାଇଁ ଶେଷ ହୋଇଛି କଳାକାରଙ୍କ ଅଭ୍ୟାସ ଆଖଡ଼ା । କୃଷ୍ଣ ବଳରାମ ଓ କଂସ ଭୂମିକାରେ ଅଭିନୟ କରୁଥିବା ସମସ୍ତ କଳାକାରମାନେ ଗତକାଲି ଆଖଡ଼ାରେ ବିଶ୍ୱ ଦରବାରର ଅନ୍ତିମ ଦୃଶ୍ୟର ଅଭ୍ୟାସ କରିଥିଲେ l ବିଶ୍ୱ ପ୍ରସିଦ୍ଧ ଧନୁଯାତ୍ରାକୁ ଆଉ ଅଳ୍ପ ଦିନ ବାକିଥିବା ବେଳେ କଳାକାରଙ୍କ ଅଭ୍ୟାସ ଶେଷ ହୋଇଛି । ସମସ୍ତ କଳାକାର ନିଜ ନିଜର ସଂଳାପ ନିଖୁଣ ଭାବରେ ଅଭ୍ୟାଶ କରିଥିବା ବେଳେ ବିଶ୍ୱ ଦରବାରକୁ ଅପେକ୍ଷା କରିଛନ୍ତି ନିଜର କଳା ପ୍ରଦର୍ଶନ କରିବାକୁ l ସେପଟେ ମଥୁରା ନଗରୀ ପାଇଁ ସାଜସଜ୍ଜା ଏବଂ କଂସ ଦରବାର ନିର୍ମାଣ କାମ ଆରମ୍ଭ ହୋଇଯାଇଛି।
ଆସନ୍ତା 15 ତାରିଖରେ ଆରମ୍ଭ ହେବାକୁ ଯାଉଛି ବିଶ୍ୱର ସର୍ବ ବୃହତମ ମୁକ୍ତାକାଶ ରଙ୍ଗମଞ୍ଚ ବରଗଡ଼ର ପ୍ରସିଦ୍ଧ ଧନୁଯାତ୍ରା । 76 ବର୍ଷକୁ ପଦାର୍ପଣ କରିଥିବା ଏହି ଧନୁଯାତ୍ରା ପାଇଁ ଏବେଠାରୁ ଚଳଚଞ୍ଚଳ ବରଗଡ଼ ସହର । ଚଳିତ ବର୍ଷ ବିଶ୍ଵ ପ୍ରସିଦ୍ଧ ଧନୁଯାତ୍ରାକୁ ବେଶ ଆକର୍ଷଣୀୟ କରିବାକୁ ପ୍ରସ୍ତୁତି କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ କଳାକାରମାନେ ମଧ୍ୟ ନିଜର ଉତ୍ତମ କଳା ପ୍ରଦର୍ଶନ କରିବାକୁ ସେମାନଙ୍କର ଅଭ୍ୟାସ ଶେଷ କରିଛନ୍ତି । ବିଶ୍ୱ ଦରବାରରେ ରୋମାଞ୍ଚକ ଅଭିନୟ ପ୍ରଦର୍ଶନ କରିବାକୁ ଏବଂ ଆକର୍ଷଣୀୟ ସଂଳାପ ପରିବେଷଣ କରିବାକୁ ଦୀର୍ଘ ଦିନରୁ ମଞ୍ଚ କଳାକାର ମାନେ ଅଭ୍ୟାସ ଆଖଡ଼ାରେ ନିଜ ନିଜର ଅଭ୍ୟାସ ଜାରି ରଖିଥିଲେ l ଜାନୁଆରୀ 1 ତାରିଖରୁ ସ୍ଥାନୀୟ କଲ୍ୟାଣ ମଣ୍ଡପଠାରେ କଂସ, ମନ୍ତ୍ରୀ, ସେନାପତି ଓ ପାର୍ଶ୍ଵ କଳାକାରମାନଙ୍କର ଅଭ୍ୟାସ ଆଖଡ଼ା ଚାଲିଥିଲା । ଗୋପପୁର ପାଳଟୁଥିବା ଅମ୍ବାପାଲି ଠାରେ କୃଷ୍ଣ, ବଳରାମ, ରାଧା ଏବଂ ଗୋପୀ ଗୋପାଙ୍ଗ ଭୂମିକାରେ ଅଭିନୟ କରୁଥିବା କୁନି କଳାକାର ମାନଙ୍କର ଅଭ୍ୟାସ ହେଉଥିଲା l