ଭଟଲି ଛକରେ ମୃତଦେହ ରଖି ଗ୍ରାମବାସୀଙ୍କ ଆନ୍ଦାେଳନ

ସଡ଼କ ଦୁର୍ଘଟଣାରେ ଚାଲିଗଲା ଯୁବକଙ୍କ ଜୀବନ । କାମ ସାରି ଘରକୁ ଫେରୁଥିବା ବେଳେ ଘଟିଲା ଅଘଟଣ । ଅଧିକ ପଢ଼ନ୍ତୁ

ବରଗଡ଼ : ସଡ଼କ ଦୁର୍ଘଟଣାରେ ଚାଲିଗଲା ଯୁବକଙ୍କ ଜୀବନ । ଏହି ଘଟଣାକୁ ନେଇ ବରଗଡ଼ ଭଟଲି ଛକରେ ଉତ୍ତ୍ୟକ୍ତ ଖଲିଆପାଲି ଗ୍ରାମବାସୀ ଆନ୍ଦୋଳନ କରିଛନ୍ତି । ଆନ୍ଦୋଳନ ଯୋଗୁଁ ଭଟଲି ଛକ ଠାରେ ବ୍ୟାପକ ଟ୍ରାଫିକ ସମସ୍ୟା ଦେଖାଦେଇଥିବା ବେଳେ ବରଗଡ଼ ଟାଉନ ପୋଲିସ ଘଟଣାସ୍ଥଳରେ ପହଞ୍ଚି ଆନ୍ଦୋଳନକାରୀଙ୍କୁ ବୁଝାସୁଝା କରିଥିଲେ ହେଁ ବିଫଳ ହୋଇଛି l

ସୂଚନା ଅନୁଯାୟୀ, ବରଗଡ଼ ଟାଉନ ଥାନା ଅନ୍ତର୍ଗତ ଖଲିଆପାଲି ଗ୍ରାମ କୁଇଲାପଡ଼ାର ଚତୁର ଲୁହା (୩୫) ବରଗଡ଼ ଭଟଲି ଛକରେ ଥିବା ଶିବମ ମେଡ଼ିକାଲରେ କାମ କରୁଥିଲେ । କାମ ସାରି ସାଇକେଲରେ ନିଜ ଘରକୁ ଫେରୁଥିବା ସମୟରେ ପଛ ପଟରୁ ବାଇକ୍ ଧକା ଦେଇ ଘଟଣାସ୍ଥଳରୁ ଫେରାର ହୋଇଯାଇଥିଲା ।

ଗୁରୁତର ଅବସ୍ଥାରେ ଚତୁର ଲୁହାଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା । ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ l ଏହି ଘଟଣାକୁ ନେଇ ଗ୍ରାମବାସୀ ବରଗଡ଼ ଭଟଲି ଛକ ଠାରେ ମୃତଦେହ ରଖି କ୍ଷତିପୂରଣ ଦାବୀ କରିବା ସହିତ ଦୋଷୀକୁ ଦଣ୍ଡ ଦିଆଯିବା ଦାବୀ ନେଇ ଆନ୍ଦୋଳନ କରିଥିଲେ ।

ଇଟିଭି ଭାରତ, ବରଗଡ଼