ପୋଲିସ ସହଯୋଗରେ ଜୁଆଖେଳ ଅଭିଯୋଗ, ଚିନ୍ତାରେ ଗ୍ରାମବାସୀ

ବରଗଡ଼ ଜିଲ୍ଲା ପଦ୍ମପୁର ଉପଖଣ୍ଡର ଜଗଦଲପୁର ଠାରେ ଖୁଲମଖୁଲା ଜୁଆଖେଳକୁ ବନ୍ଦ କରିବାକୁ ବାରମ୍ବାର ପୋଲିସ ନିକଟରେ ଅଭିଯୋଗ କରୁଛନ୍ତି ଗ୍ରାମବାସୀ । ହେଲେ ପୋଲିସ କୌଣସି କାର୍ଯ୍ୟାନୁଷ୍ଠାନ ନେଉନଥିବା ଗ୍ରାମବାସୀ ଅଭିଯୋଗ କରିଛନ୍ତି ।

ବରଗଡ: ପୋଲିସ ଉପରୁ ତୁଟିଯାଇଛି ଜିଲ୍ଲାବାସୀଙ୍କ ଭରସା । ଜୁଆଖେଳ ବନ୍ଦ କରିବା ପାଇଁ ଯେତେ ଅଭିଯୋଗ କଲେ ମଧ୍ୟ ନୀରବ ରହିଛି ପୋଲିସ । ଓଲଟା ଗ୍ରାମବାସୀଙ୍କ ଅଭିଯୋଗ ପରେ ଖୁଲମଖୁଲା ଚାଲିଛି ଜୁଆ ଓ ଘୁଡୁଘୁଡୁ ଖେଳ । ଏପରି ଘଟଣା ଘଟିଛି ବରଗଡ଼ ଜିଲ୍ଲା ପଦ୍ମପୁର ଉପଖଣ୍ଡର ଜଗଦଲପୁର ଠାରେ ।

ବାରମ୍ବାର ଜୁଆ ଓ ଘୁଡୁଘୁଡୁ ଖେଳ ଚାଲୁଥିବାରୁ ଜଗଦଲପୁର ଥାନା ଅନ୍ତର୍ଗତ ପୁଟୁକା ଗ୍ରାମରେ ବହୁ ଗଣ୍ଡଗୋଳ ଘଟି ଆସୁଛି । ଗ୍ରାମରେ ଅପ୍ରୀତିକର ପରିବେଶ ସୃଷ୍ଟି ହେଉଥିବାରୁ ଗ୍ରାମବାସୀ ଜଗଦଲପୁର ଥାନାରେ ଯେତେ ଅଭିଯୋଗ କଲେ ମଧ୍ୟ ଜୁଆଖେଳ ବନ୍ଦ ହେଉନାହିଁ । ଏନେଇ ଗ୍ରାମବାସୀ ପଦ୍ମପୁର ଏସଡିପିଓ ପ୍ରଦୀପ ସାହୁଙ୍କୁ ଜଣାଇବା ପରେ ମଧ୍ୟ କୌଣସି ପ୍ରଭାବ ପଡ଼ୁନାହିଁ । ଜୁଆଖେଳ ଚାଲିଥିବା ସମୟରେ ଲୋକେ ପୋଲିସକୁ ଜଣାଇଲେ ମଧ୍ୟ ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନାହିଁ ।

ସୂଚନାନୁଯାୟୀ, ଜଣେ ସରପଞ୍ଚଙ୍କ ସ୍ବାମୀ ଓ ବୈତାଲଭଟ୍ଟା ଗ୍ରାମର ବିକ୍ରମ ନାମକ ଅନ୍ୟଜଣେ ମିଶି ଜଗଦଲପୁର ପୋଲିସର ସହାୟତାରେ ଏହି ଜୁଆଖେଳ ଚଳାଉଛନ୍ତି । ଫଳରେ ଯେତେ ଅଭିଯୋଗ କଲେ ମଧ୍ୟ ଜୁଆଖେଳକୁ ବନ୍ଦ କରାଯାଉନଥିବା ଅଭିଯୋଗ ହେଉଛି । ତେବେ ଏନେଇ ସ୍ଥାନୀୟ ବାସିନ୍ଦା ବରଗଡ ଏସପି ପଦ୍ମିନୀ ସାହୁଙ୍କୁ ଲିଖିତ ଅଭିଯୋଗ ମଧ୍ୟ କରିଛନ୍ତି | ଦେଖିବାକୁ ବାକି ରହିଲା କେବେ ପୋଲିସ କାର୍ଯ୍ୟାନୁଷ୍ଠାନ ନେଉଛି ।

ବରଗଡରୁ ରାଜେଶ ସରାପ, ଇଟିଭି ଭାରତ