ବରଗଡ: କୋରୋନା ମହାମାରୀର ଭୟାବହତା ଲୋକଙ୍କ ମଧ୍ୟରେ ଲାଗି ରହିଥିବା ବେଳେ ସାବିତ୍ରୀ ବ୍ରତ ପାଇଁ ବରଗଡ ସହରବାସୀ ସମ୍ପୂର୍ଣ୍ଣ ଭୂଲି ଯାଇଛନ୍ତି ସାମାଜିକ ଦୂରତ୍ଵ । ସତେ ଯେପରି ଦୀର୍ଘ ଦିନ ଧରି ଘର ଭିତରେ ଲୋକେ ଗୃହବନ୍ଦୀରେ କଏଦ ହୋଇ ରହିଥିଲେ ଏବଂ ଗୋଟିଏ ଦିନର ମଉକା ପାଇ ଲୋକେ ଘରୁ ବାହାରକୁ ପାଦ କାଢିବା ପାଇଁ ଆତୁର । ବରଗଡ ଜିଲ୍ଲାରୁ ବହୁ ଶ୍ରମିକ ଅନ୍ୟ ରାଜ୍ୟକୁ ଦାଦନ ଖଟି ଯାଇଥିବା ବେଳେ ଏପର୍ଯ୍ୟନ୍ତ 3 ହଜାରରୁ ଅଧିକ ଶ୍ରମିକ ଜିଲ୍ଲାକୁ ଫେରି ସାରିଛନ୍ତି ।
ତଥାପି ମଧ୍ୟ କେହି ସଂକ୍ରମିତ ଚିହ୍ନଟ ହୋଇନଥିବା ବେଳେ ଏବେ ମଧ୍ୟ ଗ୍ରୀନ ଜୋନରେ ରହିଛି ବରଗଡ ଜିଲ୍ଲା । ଗ୍ରୀନ ଜୋନ ରହିଥିବାରୁ ଜିଲ୍ଲା ପ୍ରଶାସନ ପକ୍ଷରୁ ଦୋକାନ ବଜାର ଖୋଲିବାର ସମୟ ସୀମା ଅଳ୍ପ ବୃଦ୍ଧି ହୋଇଥିବା ବେଳେ ହୋଟେଲ, ମଲ, କପଡା ଦୋକାନ, ସୁନା ଦୋକାନ ଇତ୍ୟାଦି ଖୋଲିବାକୁ ଅନୁମତି ମଧ୍ୟ ଦିଆଯାଇଛି । ମାତ୍ର ଗ୍ରୀନ ଜୋନର ସୁଯୋଗ ନେଇ ଜନସାଧାରଣ ଅବହେଳା କରି ବଜାରରେ ଭିଡ କରୁଥିବା ଗୁରୁବାର ଦେଖିବାକୁ ମିଳିଛି ।