ବରଗଡ: ଆସନ୍ତା ୫ରେ ହେବାକୁ ଯାଉଛି ପଦ୍ମପୁର ଉପନିର୍ବାଚନ(Padampur Bypoll) । ଏଥିପାଇଁ ସରଗରମ ରହିଛି ସାରା ପଦ୍ମପୁର ନିର୍ବାଚନମଣ୍ଡଳୀ । ବିଜେଡି ଓ ବିଜେପି ଦଳର ମାଳ ମାଳ ନେତା ଓ ମନ୍ତ୍ରୀ ଏଠାରେ ଡେରା ପକାଇଛନ୍ତି । ସାଧାରଣ ସଭା ଆୟୋଜିତ କରି ଦୁଇ ଦଳ ପରସ୍ପର ସରକାରଙ୍କ ବିରୋଧରେ ନାନା ମନ୍ତବ୍ୟ ରଖୁଥିବା ବେଳେ ଏହାକୁ ନେଇ ପ୍ରତିଦିନ ସାମ୍ବାଦିକ ସମ୍ମିଳନୀ ଜରିଆରେ ଚାଲିଛି ସ୍ପଷ୍ଟୀକରଣ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସାଧାରଣ ସଭାରେ ବିଜେଡି ସରକାରକୁ କରିଥିବା ଟାର୍ଗେଟର ଦିନକ ପରେ ଜବାବ ଦେଇଛି ବିଜେଡି ।
ଧର୍ମେନ୍ଦ୍ର ପ୍ରଧାନଙ୍କ ମନ୍ତବ୍ୟ ଉପରେ ବିଜେଡି ଦଳର ବରିଷ୍ଠ ନେତା ପ୍ରସନ୍ନ ଆଚାର୍ଯ୍ୟ ସାମ୍ବାଦିକ ସମ୍ମିଳନୀ କରି ତୀବ୍ର ପ୍ରତିକ୍ରିୟା ରଖିଛନ୍ତି । କେନ୍ଦ୍ରମନ୍ତ୍ରୀ ବିଭିନ୍ନ ସଭାରେ ନରେନ୍ଦ୍ର ମୋଦି ରାଜ୍ୟକୁ ଅର୍ଥ ପ୍ରଦାନ କଲେ ବୋଲି ବାରମ୍ବାର କହୁଥିବା ବେଳେ ପ୍ରସନ୍ନ ଆଚାର୍ଯ୍ୟ ଏହାକୁ ଆକ୍ଷେପ କରିଛନ୍ତି । ସେ କହିଛନ୍ତି, ''ନରେନ୍ଦ୍ର ମୋଦି ଅର୍ଥ ଦେଇ ନାହାନ୍ତି, କେନ୍ଦ୍ର ସରକାର ଦେଇଛି ଏବଂ ତାହା ପୁଣି ରାଜ୍ୟରୁ ଯାଉଥିବା ରାଜକୋଷରୁ ଅର୍ଥ ପ୍ରଦାନ କରୁଛନ୍ତି ।'' ତେଣୁ ନରେନ୍ଦ୍ର ମୋଦି କିପରି ଦେଲେ ବୋଲି ବରିଷ୍ଠ ବିଜେଡି ନେତା ପ୍ରଶ୍ନ କରିଛନ୍ତି । ଓଲଟା ରାଜ୍ୟ ଯେତେ ଭାଗୀଦାର ପାଇବା କଥା ସେହି ଅର୍ଥ କେନ୍ଦ୍ର ରାଜ୍ୟକୁ ଦେଉନାହିଁ ବୋଲି ଅଭିଯୋଗ ଆଣିଛନ୍ତି ପ୍ରସନ୍ନ ଆଚାର୍ଯ୍ୟ ।