ସାଧାରଣ ନିର୍ବାଚନ ଘୋଷଣା ପୂର୍ବରୁ ପଦ୍ମପୁରରେ ମିଶ୍ରଣ ପର୍ବ, ବିଜେଡ଼ିରେ ମିଶିଲେ ବିଜେପିର 60 କର୍ମୀ ବରଗଡ଼: ବିଧାୟିକା ବର୍ଷା ସିଂ ବରିହାଙ୍କ ନେତୃତ୍ୱରେ ବିଜେଡିରେ ସାମିଲ ହେଲେ ବିଜେପିର 60 ଜଣ ସକ୍ରିୟ କର୍ମୀ । 2024 ସାଧାରଣ ନିର୍ବାଚନ ପାଇଁ ବର୍ତ୍ତମାନ ସମସ୍ତ ଦଳ ନିଜ ନିଜର କ୍ଷେତ୍ର ପ୍ରସ୍ତୁତ କରିବାରେ ଲାଗିଥିବାବେଳେ ପଦ୍ମପୁର ବିଧାନସଭା ମଣ୍ଡଳୀରେ ଆରମ୍ଭ ହୋଇଗଲାଣି ଦଳ ବଦଳ ପର୍ବ । ପଦ୍ମପୁରରେ ପୂର୍ବତନ ବିଧାୟକ ବିଜୟରଞ୍ଜନ ସିଂ ବରିହାଙ୍କ ମୃତ୍ୟୁ ପରେ ତାଙ୍କର ଝିଅ ବର୍ଷା ସିଂ ବରିହାଙ୍କୁ ବିଜେଡି ଦଳ ଉପନିର୍ବାଚନରେ ଟିକେଟ ଦେଇଥିଲା । ବର୍ଷା ସିଂ ବରିହା ବିଜୟୀ ହୋଇ କମ ସମୟ ପାଇଁ ପଦ୍ମପୁରର ବିଧାୟିକା ହୋଇଥିଲେ ।
ତେବେ ଆଗକୁ ପୁଣି ସାଧାରଣ ନିର୍ବାଚନ ହେବାକୁ ଥିବାବେଳେ ନିଜ ବାପାଙ୍କ ଗଡକୁ ସୁରକ୍ଷିତ ରଖିବାକୁ ବର୍ଷା ସିଁ ବରିହା ବର୍ତ୍ତମାନଠାରୁ ରଣନୀତି ଆରମ୍ଭ କରିଦେଇଛନ୍ତି । ବିରୋଧୀ ଦଳର ବହୁ କର୍ମୀମାନଙ୍କୁ ନିଜ ଦଳରେ ସାମିଲ କରିବାରେ ସଫଳ ମଧ୍ୟ ହୋଇଛନ୍ତି । ଆଜି ପଦ୍ମପୁର ଅଞ୍ଚଳର କେବଳ ବିଜେପି ଦଳରୁ ହିଁ 60 ଜଣ ସକ୍ରିୟ କର୍ମୀ ବିଜେପି ଦଳ ଛାଡ଼ି ବିଜେଡିରେ ସାମିଲ ହୋଇଛନ୍ତି ।
ଏହା ମଧ୍ୟ ପଢନ୍ତୁ...2024 Election: ଫୋକସରେ ପଶ୍ଚିମ ଓଡିଶା, ପାଗ ଭିଡିଲେଣି ଦଳ
ଆଗାମୀ ଦିନରେ ସାଧାରଣ ନିର୍ବାଚନକୁ ନେଇ ଜନସାଧାରଣ ତଥା ରାଜନୈତିକ ମହଲରେ କଳ୍ପନା ଜଳ୍ପନା ଆରମ୍ଭ ହୋଇଯାଇଛି । ସବୁ ରାଜନୈତିକ ଦଳ ନିଜ ଦଳକୁ ସୁଦୃଢ ଏବଂ ସଙ୍ଗଠନକୁ ମଜଭୁତ କରିବା ପାଇଁ କସରତ ଆରମ୍ଭ କରିଦେଇଛନ୍ତି । ତେବେ ପଦ୍ମପୁର ନିର୍ବାଚନ ମଣ୍ଡଳିରେ ଦିନକୁ ଦିନ ବିଜେଡି ଦଳ ଆହୁରି ସକ୍ରିୟ ହେବାରେ ଲାଗିଛି । ଆଜି ପାଇକମାଲ ସ୍ଥିତ ବିଜେଡି କାର୍ଯ୍ୟାଳୟଠାରେ ବିଧାୟିକା ବର୍ଷା ସିଂ ବରିହାଙ୍କ ନେତୃତ୍ୱରେ ବିଜେପି ଦଳରେ ଦୀର୍ଘ ବର୍ଷ ଧରି ସକ୍ରିୟ ଥିବା 60ରୁ ଅଧିକ କର୍ମୀ ଓ ବିଜେପିର ଆଗ ଧାଡ଼ିର ନେତା ସୋମବାର ନବୀନ ପଟ୍ଟନାୟକଙ୍କ ନୀତି ଆଦର୍ଶ ଅନୁପ୍ରାଣିତ ହୋଇ ନିଜ ଦଳ ଛାଡ଼ି ବହୁ ଉତ୍ସାହରେ ବିଜେଡିରେ ସାମିଲ ହୋଇଛନ୍ତି ।
ତେବେ ସୋମବାର ଏହି ମିଶ୍ରଣ ପର୍ବ ଆଗାମି ଦିନରେ ଆହୁରି ବହୁ ସମର୍ଥକଙ୍କ ଭିଡ ବଢାଇବ ଯାହାକି ବିକାଶ ଓ ଉନ୍ନତି ପାଇଁ ସରକାର ଙ୍କ ହାତ ମୁଠାକୁ ଆହୁରି ସହାୟକ ଏବଂ କୁଷଳ ହେବ ବୋଲି କହିଛନ୍ତି ବିଧାୟିକା । ଏହି ମିଶ୍ରଣ ପର୍ବରେ ବରଗଡ଼ ପୂର୍ବତନ ସାଂସଦ ତଥା ବର୍ତ୍ତମାନର ବିଜେଡ଼ି ଜିଲ୍ଲା ସଭାପତି ପ୍ରଭାସ ସିଂ ତଥା ବିଜେଡ଼ି କାର୍ଯ୍ୟକାରୀ ସଭାପତି ସୁଶାନ୍ତ କୁମାର ମହାପାତ୍ର ଯୋଗଦେଇ କର୍ମୀମାନଙ୍କୁ ଉତ୍ସାହିତ କରିଥିଲେ ।
ଇଟିଭି ଭାରତ,ବରଗଡ
