ବରଗଡ: ଲକଡାଉନ ଯୋଗୁଁ ଜୀବିକା ହରାଇ ବସିଛନ୍ତି ଅନେକ ଲୋକ । ଘର ଚଳାଇବା ଅନେକଙ୍କ ପକ୍ଷେ କଷ୍ଟକର ହୋଇପଡିଛି । ସରକାରଙ୍କ ସହାୟତା ଅନେକଙ୍କୁ ମିଳିଥିବା ବେଳେ ଅନେକ ଯୋଜନାଠୁ ବହୁ ଦୂରରେ । ଏଥିରୁ ବାଦ ପଡିନାହାନ୍ତି ବୁଣାକାର । ବରଗଡ ଜିଲ୍ଲା ପଦ୍ମପୁର ଉପଖଣ୍ଡ ଗାଇସିଲଟ ବ୍ଲକ ତାଳପାଳି ପଞ୍ଚାୟତ ଅଇଁଲାଭଟା ଗ୍ରାମର ବୁଣାକାର ପୁରୁଷୋତ୍ତମ ମେହେର । ଲକଡାଉନ ଯୋଗୁଁ ସବୁକିଛି ଠପ ହୋଇଯାଇଥିବା ଫଳରେ ଏବେ ଘରେ ହାତ ବାନ୍ଧି ବସିଛନ୍ତି । ଏତିକିବେଳେ ଘରର ବୋଝ ଉଠାଉଛି କୁନି ପୁଅ ।
କୁନି ପୁଅର ପରିବାର ଚିନ୍ତା , ଚଣା ବିକି ଚଳାଉଛନ୍ତି ପରିବାର
ପୁଅ ପ୍ରକାଶ ମେହେର ନବମ ଶ୍ରେଣୀର ଛାତ୍ର । ଦିନରେ ପାଠ ପଢୁଥିବା ବେଳେ ଖର ଖର୍ଚ୍ଚ ଉଠାଇବା ପାଇଁ ସନ୍ଧ୍ୟା ବେଳେ ଗାଁ ଦାଣ୍ଡରେ ବସି ମୁଢି, ଚଣା ଆଦି ବିକ୍ରି କରୁଛନ୍ତି । ସେଥିରୁ ଯେତିକି ମିଳୁଛି ସେତିକିରେ ଘର ଚଳୁଛି । ସେପଟେ ଏଯାଏଁ ସରକାରଙ୍କ ତରଫରୁ କୌଣସି ସହାୟତା ମିଳିପାରିନାହିଁ । ସରକାର ଗରିବଙ୍କ ପାଇଁ ଯୋଜନା ପ୍ରଣୟନ କରୁଛନ୍ତି ସତ ହେଲେ ଯୋଜନାରୁ ବହୁ ଦୂରରେ ଏହି ଗରିବ ପରିବାର ।