ଆଇନଜୀବୀଙ୍କୁ ପୋଲିସ ଅଧିକାରୀଙ୍କ ଦୁର୍ବ୍ୟବହାର ଅଭିଯୋଗ

ବରଗଡ଼ ସଦର ଥାନା ଅଧିକାରୀଙ୍କ ବିରୋଧରେ ଦୁର୍ବ୍ୟବହାର ଅଭିଯୋଗ କରି ଆନ୍ଦୋଳନକୁ ଓହ୍ଲାଇବେ ଓକିଲ ସଂଘ ।

ବରଗଡ: ପୁଣି ଫେରିଛି ଆଇନଜୀବୀଙ୍କ ଉପରେ ପୋଲିସ ଅଧିକାରୀଙ୍କ ଦୁର୍ବ୍ୟବହାର ଘଟଣା । ଯାହାକୁ ବିରୋଧ କରି ବରଗଡ଼ ଓକିଲ ସଂଘ ଆଜି କାର୍ଯ୍ୟବନ୍ଦ ଡାକରା ଦେବା ସହ ଆନ୍ଦୋଳନକୁ ଓହଲ୍ଲାଇବାକୁ ନିଷ୍ପତ୍ତି ନେଇଛି । ବରଗଡ଼ ସଦର ଥାନା ଅଧିକାରୀଙ୍କ ବିରୋଧରେ ଦୁର୍ବ୍ୟବହାର ଅଭିଯୋଗ କରି ଆନ୍ଦୋଳନକୁ ଓହ୍ଲାଇବେ ଓକିଲ ସଂଘ ।

ବାରମ୍ବାର ଆଇନଜୀବୀ ଓ ପୋଲିସ କର୍ମଚାରୀଙ୍କ ମଧ୍ୟରେ ମାଡମରା ଓ ଦୁର୍ବ୍ୟବହାର ଭଳି ଘଟଣା ସାମ୍ନାକୁ ଆସୁଛି । ଆଉ ଏଭଳି ଅଭିଯୋଗ ଆସିଛି
ବରଗଡ଼ ସଦର ଥାନା ଅଧିକାରୀ କଲ୍ୟାଣି ବେହେରାଙ୍କ ନାଁରେ । ସେ ଜଣେ ମହିଳା ପୋଲିସ ହୋଇ ମଧ୍ୟ ଜନସାଧାରଣଙ୍କୁ ଦୁର୍ବ୍ୟବହାର କରିବା ସହ ଅସଭ୍ୟ ଭାଷାରେ ଗାଳିଗୁଲଜ କରୁଥିବା ଅଭିଯୋଗ ରହିଛି ।

ତେବେ ତାଙ୍କ ନାଁରେ ବାରମ୍ବାର ଅଭିଯୋଗ ଆସୁଥିଲେ ମଧ୍ୟ ତାଙ୍କ ବିରୋଧରେ କୌଣସି ପଦକ୍ଷେପ ନିଆଯାଉ ନଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ ବଢ଼ିଚାଲିଛି । ମହିଳା ପୋଲିସ କଲ୍ୟାଣି ବେହେରାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ଅନ୍ୟତ୍ର ବଦଳି ଦାବି ହୋଇଛି । ବରଗଡ଼ ଓକିଲ ସଂଘ ପକ୍ଷରୁ ଏହି ଘଟଣାକୁ ଦୃଢ ନିନ୍ଦା କରିଛି । ଏହାସହ ଆଜି କୋର୍ଟ ଖୋଲିବା ପରେ ଓକିଲ ସଂଘ କାର୍ଯ୍ୟ ବନ୍ଦ କରି ଆନ୍ଦୋଳନରେ ବସିବାକୁ ନିଷ୍ପତ୍ତି ନେଇଛନ୍ତି ।

ବରଗଡରୁ ରାଜେଶ ସରାପ, ଇଟିଭି ଭାରତ