ବରଗଡରେ ବନ୍ୟା ସ୍ଥିତି, ଗାଁରେ ପଶିଲା ବନ୍ୟାଜଳ

ଦୁଇଦିନ ବର୍ଷାରେ ବେହାଲ ବରଗଡ । ବିଭିନ୍ନ ଅଞ୍ଚଳରେ ପ୍ରଚୁର ବର୍ଷା ହେବା ସହ ଗଛ ଭାଙ୍ଗି ରାସ୍ତା ଉପରେ । ତେବେ କ୍ଷୟକ୍ଷତିରେ ଆକଳନ କରୁଛନ୍ତି ଜିଲ୍ଲାପାଳ ।

ବରଗଡ: ଗତ ଦୁଇ ଦିନ ହେଲା ଜିଲ୍ଲାରେ ପ୍ରଚୁର ବର୍ଷା ଲାଗିରହିଥିବା ବେଳେ ବହୁ ସ୍ଥାନରେ ବନ୍ୟା ପରିସ୍ଥିତି ଉପୁଜିଛି । କେଉଁଠି ମାଟି ଘର ଭୁସୁଡି ପଡିଥିବା ବେଳେ ଆଉ କେଉଁଠି ବଡବଡ ଗଛ ଭାଙ୍ଗି ରାସ୍ତା ଉପରେ ପଡିରହିଛି । ସେପଟେ ଲୋକଙ୍କ କ୍ଷୟକ୍ଷତିର ଆକଳନ କରୁଛନ୍ତି ଜିଲ୍ଲାପାଳ ।

ଲଘୁଚାପ ଜନିତ ବର୍ଷା ସାରା ରାଜ୍ୟରେ ଲାଗିରହିଥିବା ବେଳେ ବରଗଡ ଜିଲ୍ଲାରେ ମଧ୍ୟ ଏହାର ପ୍ରଭାବ ଦେଖିବାକୁ ମିଳିଛି। ଗାଇସିଲେଟ ବ୍ଲକର ଅଙ୍ଗ ନଦୀ ଜଳ ଗାଁ ଭିତରକୁ ପ୍ରବେଶ କରି ବନ୍ୟା ପରିସ୍ଥିତି ସୃଷ୍ଟି ହୋଇଛି । ଅନ୍ୟପକ୍ଷେ ଅମ୍ବଭୋନା ବ୍ଲକର ଚିକିଳି ଗ୍ରାମ ନିକଟକୁ ମହାନଦୀର ପାଣି ମାଡି ଆସିଥିବାରୁ ଲୋକଙ୍କ ମଧ୍ୟରେ ଭୟ ସୃଷ୍ଟି ହୋଇଥିଲା ।

ତେବେ ବରଗଡ ଜିଲ୍ଲାପାଳ ଜ୍ୟୋତିରଞ୍ଜନ ପ୍ରଧାନ ଅମ୍ବଭୋନାର ଚିକିଳି ତଥା ବନ୍ୟା ସମ୍ଭାବିତ ଅଞ୍ଚଳକୁ ପରିଦର୍ଶନ ପାଇଁ ଯାଇଥିଲେ । ତେବେ ବରଗଡ ଭେଡେନ ରାସ୍ତାରେ ମଧ୍ୟ ବଡବଡ ଗଛ ଉପୁଡି ପଡିଥିବାରୁ ଯାନବାହାନ ଯାତାୟତରେ ବାଧା ସୃଷ୍ଟି ହୋଇଛି । ଅଗ୍ନିଶମ ବିଭାଗ ପକ୍ଷରୁ ରାସ୍ତା କଡରେ ପଡିରହିଥିବା ଗଛ ଗୁଡିକୁ ସଫାକରାଯିବା ପରେ ଯାତାୟତ ସାଧାରଣ ହୋଇଥିଲା ।

ବରଗଡରୁ ରାଜେଶ ସରାପ, ଇଟିଭି ଭାରତ