ବରଗଡ଼:ଚାଷୀ ସଙ୍ଗଠନ ସମନ୍ବୟ ସମିତିର ଶତାଧିକ ଚାଷୀ ଆଜି(ସୋମବାର) ଜିଲ୍ଲାପାଳଙ୍କ କାର୍ଯ୍ୟାଳୟକୁ ଘେରାଉ କରିଛନ୍ତି । ଚାଷୀଙ୍କ ବିଭିନ୍ନ ସମସ୍ୟାର ସମାଧାନ ନ ହେଲେ ବ୍ୟାପକ ଆନ୍ଦୋଳନ କରାଯିବ ବୋଲି ସେମାନେ ଜିଲ୍ଲା ପ୍ରଶାସନକୁ ବାରମ୍ବାର ଚେତାବନୀ ଦେଇଥିଲେ । ମାତ୍ର ସେମାନଙ୍କ କଥାକୁ ପ୍ରଶାସନ କର୍ଣ୍ଣପାତ ନ କରିବା ପରେ ଉତ୍ତ୍ୟକ୍ତ ଚାଷୀମାନେ ଅଫିସ ଘେରି ଆନ୍ଦୋଳନ କରିଛନ୍ତି ।
ଚାଷୀ ସମସ୍ୟା: ୧୨ ଦଫା ଦାବି ନେଇ ବରଗଡ଼ ଜିଲ୍ଲାପାଳଙ୍କ ଅଫିସ ଘେରାଉ
ଜିଲ୍ଲାରେ ମରୁଡ଼ି ସ୍ଥିତି ଏବଂ ଚାଷୀଙ୍କ ବିଭିନ୍ନ ସମସ୍ୟାକୁ ନେଇ ଜିଲ୍ଲାରେ ପୁଣି ବ୍ୟାପକ ଆନ୍ଦୋଳନର ମୁଣ୍ଡ ଟେକିଛି । ଚାଷୀ ସଙ୍ଗଠନ ସମନ୍ବୟ ସମିତି ପକ୍ଷରୁ ଚାଷୀର 12 ଦଫା ଦାବି ନେଇ ଆଜି ସ୍ଥାନୀୟ ଜିଲ୍ଲାପାଳ ଅଫିସ ଘେରି ଆନ୍ଦୋଳନକୁ ଓହଲ୍ଲାଇଛି । ଚଳିତ ଖରିଫ ଋତୁରେ ବିଳମ୍ବରେ ବର୍ଷା କାରଣରୁ ବରଗଡ ଜିଲ୍ଲାର ବହୁ ଅଞ୍ଚଳରେ ମରୁଡ଼ି ସମସ୍ୟା ଦେଖାଦେଇଛି । ଅନ୍ୟପଟେ ଗତ ରବି ଋତୁରେ ଅନେକ ଚାଷୀ ତାଙ୍କ ଅର୍ଜିତ ଧାନ ବିକ୍ରି କରିନପାରି ଆଜି ମଧ୍ୟ ଧାନ ସବୁ ଚାଷୀର ଘରେ ପଡିରହିଛି ।