ବରଗଡ: ଗୁରୁବାର ଜିଲ୍ଳାରେ ୨୭ ଜଣ ନୂତନ ରୋଗୀ ଚିହ୍ନଟ ହୋଇଛନ୍ତି । ଫଳରେ ମୋଟ ସଂକ୍ରମିତଙ୍କ ସଂଖ୍ୟା 742କୁ ବୃଦ୍ଧି ପାଇଛି । ତେବେ ଆକ୍ରାନ୍ତ ବ୍ୟକ୍ତିମାନେ ବରଗଡ଼ ପୌରାଞ୍ଚଳ, ବରାହଗୁଡ଼ାର ବିକାଶ ମଲଟି ହସପିଟାଲ, ଘେଁସ ପଂଚାୟତର ଚୁହାନପାଲି, ବରପାଲି ଏନଏସି, ଅତାବିରା ବ୍ଳକର ଲଚିଦା, ବରପାଲି ବ୍ଳକର ତୁମଗାଁ ଆଦି ଅଞ୍ଚଳର ବୋଲି ସୂଚନା ଦିଆଯାଇଛି ।
ସେହିପରି ଜିଲ୍ଲାରେ କୋରୋନାରେ ମୃତକଙ୍କ ସଂଖ୍ୟା 3 ରହିଥିବା ବେଳେ ବରଗଡ଼ କୋଭିଡ଼ ହସପିଟାଲରେ ଚିକିତ୍ସିତ ହେଉଥିବା ଅତାବିରା ଅଂଚଳର ଜଣେ ବ୍ୟକ୍ତିଙ୍କ ଗୁରୁବାର ମୃତ୍ୟୁ ଘଟିଛି ବୋଲି ମୃତକଙ୍କ ପରିବାର ସୂତ୍ରରୁ ଜଣା ପଡ଼ିଛି । ମୃତକ ଜଣକ ଗତ କିଛିଦିନ ହେବ ବରଗଡ଼ର କୋଭିଡ଼ ହସପିଟାଲରେ ଚିକିତ୍ସିତ ହେଉଥିଲେ ।
ତେବେ ସଂପୃକ୍ତ ବ୍ୟକ୍ତିଙ୍କ ମୃତ୍ୟୁ କୋରୋନା ଜନିତ ନା ଅନ୍ୟ କେଉଁ କାରଣରୁ ହୋଇଛି ସେସଂପର୍କରେ ଜିଲ୍ଳା ପ୍ରଶାସନ କିମ୍ବା ସ୍ୱାସ୍ଥ୍ୟ ବିଭାଗ ପକ୍ଷରୁ କୌଣସି ସୂଚନା ଦିଆଯାଇନାହିଁ । ଏପରିକି ରାଜ୍ୟ ସରକାରଙ୍କ ସ୍ୱାସ୍ଥ୍ୟ ଓ କଲ୍ୟାଣ ବିଭାଗର ମଧ୍ୟ ଏ ସଂକ୍ରାନ୍ତରେ କୌଣସି ସୂଚନା ମିଳିନାହିଁ । କୋଭିଡ଼ ହସପିଟାଲରେ ଚିକିତ୍ସିତ ହେଉଥିବା ରୋଗୀଙ୍କ ସଂପର୍କରେ ପରିବାରବର୍ଗଙ୍କୁ କୌଣସି ସୂଚନା ଦିଆଯାଉନଥିବା ପ୍ରତିବାଦରେ ମଙ୍ଗଳବାର ଦିନ ଅତାବିରାରେ ଉତ୍ତେଜନା ପ୍ରକାଶ ପାଇଥିଲା ଏବଂ ଉତ୍ୟକ୍ତ ଲୋକେ ଏନଏସି ଅଫିସ ଘେରାଉ କରିଥିଲେ । ତେବେ ରୋଗୀଙ୍କର ମୃତ୍ୟୁ ଖବର ପାଇବା ପରେ ପରିବାର ଲୋକେ ଉତ୍ୟକ୍ତ ହୋଇ ହସ୍ପିଟାଲ ଆଗରେ ବିରୋଧ ପ୍ରଦର୍ଶନ କରିଥିଲେ ।
ବରଗଡରୁ ରାଜେଶ ସରାପ, ଇଟିଭି ଭାରତ
