ବରଗଡ:ବନ୍ଦ ଘର ଭିତରୁ ୩ ଜଣଙ୍କ କ୍ଷତାକ୍ତ ମୃତଦେହ ଉଦ୍ଧାର ଘଟଣାରେ ବଡ ସୁରାକ୍ ମିଳିଛି । ଯାହା ଆତ୍ମହତ୍ୟା ଜନିତ ମୃତ୍ୟୁ ନୁହେଁ ବରଂ ଟ୍ରିପଲ ମର୍ଡର ବୋଲି ଏକପ୍ରକାର ସ୍ପଷ୍ଟ କରୁଛି । ସନ୍ଧାନୀ କୁକୁର ସହାୟତାରେ ମୃତକଙ୍କ ଘରକୁ ଲାଗିଥିବା କେନାଲ ମଧ୍ୟରୁ ଗୋଟିଏ ଧାରୁଆ ଅସ୍ତ୍ର ମିଳିଛି । ସମସ୍ତ ମୃତକଙ୍କ ମୁଣ୍ଡରେ ଗଭୀର ଆଘାତ ଲାଗି ଥିବାବେଳେ ଏହି ମାରଣାସ୍ତ୍ର ସାହାଯ୍ୟରେ ସେମାନଙ୍କୁ ହତ୍ୟା କରାଯାଇଥିବା ଅନୁମାନ କରାଯାଉଛି । ସେହିପରି ମୃତଦେହ ଉଦ୍ଧାର ସମୟରେ ଘରର ବାହାର ପଟ କବାଟ ବନ୍ଦ ରହିଥିବା ବେଳେ ଘର ପଛପଟେ କେନାଲକୁ ଲାଗି ରହିଥିବା କବାଟ ଖୋଲା ରହିଥିଲା । ସନ୍ଧାନୀ କୁକୁର ମଧ୍ୟ କେନାଲ ଭିତରକୁ ଯାଇଥିଲା । ଏହିସବୁ ପାରିପାର୍ଶ୍ଵିକ ସ୍ଥିତିରୁ ଏହା ଏକ ବୀଭତ୍ସ ହତ୍ୟାକାଣ୍ଡ ହୋଇଥିବା ପୋଲିସ ସନ୍ଦେହ କରୁଛି ।
ହେଲେ ଏହି ଟ୍ରିପଲ ମର୍ଡର ପଛର କାରଣ କ'ଣ ? କିଏ ଏହି ବୀଭତ୍ସ ହତ୍ୟାକାଣ୍ଡ ଘଟାଇ ଫେରାର ହୋଇଥାଇପାରେ ? ସମ୍ପତ୍ତି ଲୋଭରେ ହତ୍ୟା କରାଯାଇଛି କି ? ଦୁଇ ମହିଳାଙ୍କ ବେକରେ ସୁନା ମାଳି ରହିଥିଲେ ମଧ୍ୟ ହତ୍ୟାକାରୀ ସୁନା ନନେଇ ଚାଲିଯିବା ଲୁଟ ଓ ଡ଼କାୟତି ଘଟଣା ନୁହେଁ ସ୍ପଷ୍ଟ କରୁଥିବାବେଳେ ହତ୍ୟାର କାରଣ କ'ଣ ହୋଇପାରେ ? ଏପରି ଅନେକ ଅସମାହିତ ପ୍ରଶ୍ନ ସମସ୍ତଙ୍କ ମନରେ ଆସୁଥିବାବେଳେ ପୋଲିସ ବିଭିନ୍ନ ଦିଗରେ ତଦନ୍ତ ଚଳାଇଛି ।