ବରଗଡ: ଅନ୍ତର୍ଜାତୀୟ ମହିଳା ଦିବସରେ ବରଗଡରେ ଅସହାୟ ଯୁବକର ମୃତଦେହକୁ କାନ୍ଧ ଦେଇ ନିଆରା ଉଦାହରଣ ସୃଷ୍ଟି କରିଛନ୍ତି ବରଗଡର ସଚେତନ ମହିଳା l ମହିଳା ଦିବସରେ ବିଶ୍ବର ପ୍ରତିଟି କୋଣରେ ମହିଳାର ସମ୍ମାନ, ମର୍ଯ୍ୟାଦାକୁ ନେଇ ମହିଳା ଦିବସ ପାଳନ ହେଉଥିବା ବେଳେ ସ୍ଥାନୀୟ ଅମ୍ବାପାଲିଠାରେ ହିନ୍ଦୁ ଧର୍ମର ରୀତିନୀତିକୁ ଖାତିର ନକରି ମହିଳାମାନେ ନିଜେ ଶବକୁ କାନ୍ଧେଇ ଶବ ସତ୍କାର କରିଛନ୍ତି ଏବଂ ଏକ ନିଆରା ଉଦାହରଣ ସୃଷ୍ଟି କରିଛନ୍ତି ସମାଜ ପାଇଁ ।
ସଚେତନ ମହିଳାଙ୍କ ନିଆରା ସନ୍ଦେଶ, ‘ସମାଜ ଧର୍ମଠୁ ସର୍ବାଗ୍ରେ ମାନବ ଧର୍ମ’
ଲକ୍ଷ୍ମଣ କୁଅଁର ନାମକ ବ୍ୟକ୍ତି ଗତ 2ତାରିଖରେ ସଡ଼କ ଦୁର୍ଘଟଣାର ଶିକାର ହୋଇ ବୁର୍ଲା ଡାକ୍ତରଖାନାରେ ଚିକିତ୍ସିତ ହେଉଥିଲେ । ମାତ୍ର ରବିବାର ତାଙ୍କର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିଲା । ତେବେ ଲକ୍ଷ୍ମଣଙ୍କର ପରିବାରରେ ତାଙ୍କ ସ୍ତ୍ରୀ ସହିତ ଛୋଟ ଛୋଟ ଚାରୋଟି ଝିଅ ଥିବା ବେଳେ ଶବ ସତ୍କାର ପାଇଁ ଅସହାୟ ହୋଇ ପଡିଥିବା ଗରିବ ପରିବାରକୁ ସ୍ଥାନୀୟ ମହିଳାମାନେ ସାହାଯ୍ୟର ହାତ ବଢାଇବା ସହିତ ମହିଳାମାନେ ନିଜେ ମୃତଦେହକୁ ନିଜ କାନ୍ଧରେ ବୋହି ନେଇଥିଲେ ସତ୍କାର ପାଇଁ ।