ବରଗଡ଼: ଜିଲ୍ଲାର ଚାଷୀଙ୍କ ଧାନ ବିକ୍ରି ସମସ୍ୟାର ସମାଧାନ ଆଜି ପର୍ଯ୍ୟନ୍ତ ହେଲାନାହିଁ । ଟୋକନ ଫେରିଯିବା କାରଣରୁ ଗତ ରବି ଫସଲର ଧାନ ବିକ୍ରି ହୋଇନପାରି ଏବେ ବହୁ ଚାଷୀଙ୍କ ଧାନ ଘରେ ଏବଂ ମଣ୍ଡିରେ ପଡିରହିଛି । ଯାହାର ଲାଭ ଏବେ ମିଲର ମାନେ ଉଠାଇବାରେ ଲାଗିପଡିଛନ୍ତି ।
ଧାନ ବସ୍ତା ପ୍ରତି ଦାମ ୧୩୬୧ ଟଙ୍କା ରହିଥିବା ବେଳେ ମିଲର ମାନେ ୧୦୦୦ ଟଙ୍କାରେ ଚାଷୀଙ୍କୁ ମାଗୁଛନ୍ତି । ଯାହା ଫଳରେ ଚାଷୀ ଏବେ ଧାନ ବିକ୍ରି କରିନପାରି ମୁଣ୍ଡରେ ହାତ ଦେଇ ବସିଛି ।
ବରଗଡରେ ବହୁ ଚାଷୀଙ୍କ ଗତ ରବି ଫସଲର ଧାନ ବିକ୍ରି ନହୋଇ ଘରେ ଏବଂ ଧାନ ମଣ୍ଡିରେ ପଡିଥିବା ବେଳେ ସରକାର ଚାଷୀଙ୍କ ଟୋକନ ଫେରାଇ ଦେଇଛନ୍ତି । ଫଳରେ ଚାଷୀ ଅତାବିରାଠାରେ ଆନ୍ଦୋଳନ କରିଥିଲେ ମାତ୍ର କୌଣସି ସୁଫଳ ମିଳିନଥିଲା । ଓଲଟା ପୋଲିସ ସେଠାରେ ଆନ୍ଦୋଳନ କରୁଥିବା ଚାଷୀ ନେତା ମାନଙ୍କୁ ଗିରଫ କରି ନେଇଯାଇଥିଲା । ତେବେ ଚାଷୀ ତାର ଧାନ ବିକ୍ରି ପାଇଁ ଆଶାବାନ୍ଧି ବସିଥିବା ବେଳେ ଆଜି ପର୍ଯ୍ୟନ୍ତ ସରକାର କୌଣସି ସୁବିଧା କରିପାରିଲେ ନାହିଁ । ବରଗଡ ଜିଲ୍ଲାର ଚାଷୀଙ୍କ ପାଇଁ ଓଲଟା ଧାନର ଅଭାବି ବିକ୍ରିର ରାସ୍ତା ଖୋଲିଦେଇଛନ୍ତି, ଯାହାକୁ ନେଇ ଚାଷୀ କୂଳରେ ଭାରି ଅସନ୍ତୋଷ ଦେଖାଦେଇଛି । ବର୍ତ୍ତମାନ ସମୟରେ ଚାଷୀଙ୍କ ପାଇଁ ଧାନ ଚାଷ ଏକ କଷ୍ଟସାଧ୍ୟ ବ୍ୟାପାର ହେବାକୁ ବସିଲାଣି । ଫଳରେ ଚାଷୀ ଆଉ ଆଗକୁ ଚାଷ କାମ କରିବେ ନାଁ ନାହିଁ ସେନେଇ ଚିନ୍ତାରେ ପଡିଯାଇଛନ୍ତି ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
