ବରଗଡ଼: ବିଶ୍ବର ସର୍ବ ବୃହତ ମୁକ୍ତାକାଶ ରଙ୍ଗମଞ୍ଚର ଚତୁର୍ଥ ଦିନରେ ମହାରାଜ କଂସଙ୍କ ଦ୍ବାରା ପ୍ରେରିତ ସମସ୍ତ ରାକ୍ଷସ ରାକ୍ଷସୀଙ୍କୁ ବଦ୍ଧ କରିଛନ୍ତି କୃଷ୍ଣ ବଳରାମ । ଯାହାକୁ ନେଇ ଗୋପପୁରରେ ଦେଖାଦେଇଛି ଉତ୍ସବର ମାହୋଲ । ଘରେ ଘରେ କୃଷ୍ଣ ବଳରାମଙ୍କୁ ପୁଜାର୍ଚ୍ଚନା କରାଯାଇଥିବା ବେଳେ କୃଷ୍ଣ ବଳରାମଙ୍କୁ ପାଖରେ ପାଇ ଗୋପପୁର ବାସୀ ଉତ୍ସାହିତ ହୋଇ ପଡିଛନ୍ତି ।
ରାକ୍ଷସ ରାକ୍ଷସୀଙ୍କୁ ବଦ୍ଧ କଲେ କୃଷ୍ଣ ବଳରାମ ଧନୁଯାତ୍ରାର ଚତୁର୍ଥ ଦିନରେ ଗୋପପୁରର ଦୃଶ୍ୟ ଥିଲା ନିଆରା । ଲାଗୁଥିଲା ଦ୍ବାପର ଯୁଗ ସତେ ଯେମିତି ଫେରି ଆସିଛି ଭଗବାନ ଶ୍ରୀକୃଷ୍ଣ ଓ ବଡ଼ଭାଇ ବଳରାମ ଚନ୍ଦ୍ରକଳା ପରି ନନ୍ଦ ଉଆସରେ ବଢ଼ିବାରେ ଲାଗିଥିବା ବେଳେ ଗୋପପୁରରେ ଭଗବାନଙ୍କ ନଗର ପରିକ୍ରମା ପାଇଁ ଆୟୋଜନ କରାଯାଇଥିଲା । ଏଥିପାଇଁ ସାରା ଗୋପପୁର ଉତ୍ସବ ମୁଖରିତ ହୋଇଥିଲା । ଘରେ ଘରେ ମୁରୂଜ ପକାଇ କୃଷ୍ଣବଳରାମଙ୍କ ପାଦଧୋଇ ପୂଜାର୍ଚ୍ଚନା କରାଯାଇଛି ।
ଶ୍ରୀକୃଷ୍ଣଙ୍କ ଲିଳାରେ ଗୋପପୁର ଉତ୍ସବ ମୁଖର ଥିବା ବେଳେ, କୃଷ୍ଣଙ୍କ ସହ ତାଙ୍କ ଶଖା ମଧୁମଙ୍ଗଳ ଓ ଗୋପ ବାଳକ ମାନେ ଗୀତ ନାଚ କରି ଗାଁ ପରିଭ୍ରମଣ କରିଛନ୍ତି । ସେହିପରି ପ୍ରଭୁ ଶ୍ରୀକୃଷ୍ଣ ଗୋପାଳ ବାଳକଙ୍କ ସହ ଖେଳ କୁଦରେ ବ୍ୟସ୍ତ ତ ଆଉ କେତେବେଳେ ଲୁଚି ଲୁଚି ମାଟି ଖାଇବାରେ ବ୍ୟସ୍ତ ।
ଏପଟେ କଂସଙ୍କ ପ୍ରେରିତ ପୁତନା, ବକାସୁର, ସକଟାସୁରା, ତୃଣା ଓ ଧେନୁକା କପଟ କରି କୃଷ୍ଣ ବଳରାମକୁ ମାରିବାକୁ ଗୋପରେ ଆସିଥିଲେ ଗୋପପୁର । ପ୍ରଭୁଙ୍କୁ ମାରିବାକୁ ସବୁପ୍ରକାର ଉଦ୍ୟମ କରିଛନ୍ତି ହେଲେ ଗୋଟି ଗୋଟି କରି ନିହତ ହୋଇଛନ୍ତି କୃଷ୍ଣବଳରାମଙ୍କ ହାତରେ । ଏହି ସବୁ ଦୃଶ୍ୟ ଅଭିନୀତ ହୋଇଥିଲା ଗୋପପୁରରେ । ଧନୁଯାତ୍ରା ସମୟରେ ଗୋପପୁର କୁହାଯାଉଥିବା ଏହି ଅମ୍ବାପାଲି ଗାଁ ସତରେ ସେଇ ଦ୍ବାପର ଯୁଗକୁ ନେଇ ଯାଇଥାଏ ଆଉ ଏହି ସମୟରେ ଗାଁରେ ଭକ୍ତିମୟ ପରିବେଶ ସୃଷ୍ଟି ହୋଇଥାଏ । ଦର୍ଶକ ମାନେ ଦୂର ଦୂରାନ୍ତରୁ ଭଗବାନ କୃଷ୍ଣଙ୍କର ବାଲ୍ୟଲୀଳା ଦେଖିବାକୁ ପହଞ୍ଚିଛନ୍ତି ଏବଂ ବେଶ ଉପଭୋଗ କରିଛନ୍ତି ।
ବରଗଡ଼ରୁ ରାଜେଶ ସରାପ, ଇଟିଭି ଭାରତ
