ପରିବାର ପାଇଁ ବଦଳିଲା ପରିଚୟ, ଚାକିରିଆରୁ ମାଛ ଚାଷୀ - ପରିବାର ପାଇଁ ବଦଳିଲା ପରିଚୟ
ପ୍ରତିକୂଳ ପରିସ୍ଥିତିକୁ ସାମ୍ନା କରି ଆଗକୁ ବଢୁଥିବା ମଣିଷ ହିଁ ସଫଳତା ପାଇଥାଏ । ଯାହାକୁ ପ୍ରମାଣିତ କରି ଦେଖାଇଛନ୍ତି ବାଲେଶ୍ଵର ଜିଲ୍ଲା ସୋର ଅଞ୍ଚଳର ଯୁବକ ରତନଲାଲ ପଣ୍ଡା । ଦିଲ୍ଲୀରେ ବଡ ଚାକିରି ଛାଡ଼ି ହୋଇଗଲେ ସଫଳ ମାଛଚାଷୀ । ପଢନ୍ତୁ ସମ୍ପୂର୍ଣ୍ଣ ଖବର..
ବାଲେଶ୍ବର: କୁହାଯାଏ ମଣିଷ ପରିସ୍ଥିତିର ଦାସ । ପ୍ରତିକୂଳ ପରିସ୍ଥିତିକୁ ସାମ୍ନା କରି ଆଗକୁ ବଢୁଥିବା ମଣିଷ ହିଁ ସଫଳତା ପାଇଥାଏ । ଯାହାକୁ ପ୍ରମାଣିତ କରି ଦେଖାଇଛନ୍ତି ବାଲେଶ୍ଵର ଜିଲ୍ଲା ସୋର ଅଞ୍ଚଳର ଯୁବକ ରତନଲାଲ ପଣ୍ଡା । ଦିଲ୍ଲୀରେ ବଡ ଚାକିରି ଛାଡ଼ି ହୋଇଗଲେ ସଫଳ ମାଛଚାଷୀ । ବାୟୋଫ୍ଲୋକ ମାଧ୍ୟମରେ ମାଛଚାଷ କରି ରୋଜଗାର କ୍ଷମ ହେବା ସହିତ ସ୍ଥାନୀୟ ଅଞ୍ଚଳର ଯୁବକ ମାନଙ୍କୁ ମଧ୍ୟ ରୋଜଗାରକ୍ଷମ କରାଇଛନ୍ତି ।
ରତନ ଉଚ୍ଚଶିକ୍ଷା ପରେ ଦିଲ୍ଲୀର ଏକ ଘରୋଇ କମ୍ପାନୀରେ ଭଲ ଦରମାରେ ଚାକିରି କରୁଥିଲେ । ହେଲେ ଘରେ ବୟସର ଅପରାହ୍ନରେ ପାଦ ଦେଇଥିବା ବାପା ମାଆଙ୍କ ସ୍ବାସ୍ଥ୍ୟବସ୍ଥାକୁ ଚିନ୍ତାରେ ରହୁଥିଲେ ରତନ । ଏହାପରେ ସେ ଦିଲ୍ଲୀରୁ ଆସି ଭୁବନେଶ୍ୱରରେ ଚାକିରି କରିଥିଲେ । ମାତ୍ର ଘରେ ବାପା ମାଆଙ୍କ ଦେଖାଶୁଣା କରିବା ପାଇଁ କେହି ନଥିବା ଯୋଗୁଁ ରତନ ବାଧ୍ୟ ହୋଇ ଚାକିରୀ ଛାଡି ସୋର ପଳାଇ ଆସିଥିଲେ ।
ସୋର ଆସିବା ପରେ ଘରେ ବସି କିଛି କରିବାର ଚିନ୍ତା କରୁ କରୁ ଗୁଗୁଲ ଏବଂ ୟୁଟ୍ୟୁବରୁ ଏହିପରି ମାଛଚାଷ ସମ୍ପର୍କରେ ଜାଣିବାକୁ ପାଇଥିଲେ । ପ୍ରଥମେ ଗୋଟିଏ ଟାଙ୍କିରେ ମାଛଚାଷ କରି ସଫଳ ହେବାପରେ ଏବେ ପାଞ୍ଚଟି କୁଣ୍ଡରେ ଦେଶୀ କଉ ମାଛ ଚାଷ କରୁଛନ୍ତି । ଯାହାଫଳରେ ମାସକୁ ୫୦ ହଜାର ଟଙ୍କା ରୋଜଗାର କରୁଛନ୍ତି । ଯାହା ତାଙ୍କୁ ଚାକିରି ଠାରୁ ଅଧିକ ରୋଜଗାର ଦେବାସହ ଘରୋଇ କାମ ଏବଂ ବୃଦ୍ଧ ପିତାମାତାଙ୍କ ଦେଖା ଶୁଣା କରିପାରୁଛନ୍ତି ବୋଲି ସେ କହିଛନ୍ତି।