ବାଲେଶ୍ୱର: ସହରରେ ଡକାୟତି ଉଦ୍ୟମ କରୁଥିବା ୯ଜଣ ଯୁବକଙ୍କୁ ପୋଲିସ ଗିରଫ କରିଛି । ଡକାୟତି କରିବା ପାଇଁ ଯୋଜନା ପ୍ରସ୍ତୁତ ବେଳେ ପୋଲିସ ଖବର ପାଇ ସେମାନଙ୍କୁ ଗିରଫ କରିବାରେ ସଫଳ ହୋଇଛି । ବାଲେଶ୍ୱର ସହଦେବଖୁଣ୍ଟା ଆଦର୍ଶ ଥାନା ଅଧିକାରୀ ଶୁଭ୍ରାଂଶୁ ଶେଖର ନାୟକ ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
ଭିଡିଓ ସୌଜନ୍ୟ: ସମ୍ବାଦଦାତା, ବାଲେଶ୍ବର
ସୂଚନା ଅନୁସାରେ, ରବିବାର ବିଳମ୍ବିତ ରାତିରେ ୯ଜଣ ଯୁବକ ସହଦେବଖୁଣ୍ଟା ଆଦର୍ଶ ଥାନା ଅଞ୍ଚଳରେ ଡକାୟତି କରିବା ପାଇଁ ଫିରିଙ୍ଗିପାଟଣାସ୍ଥିତ ଏକ ଅର୍ଦ୍ଧନିର୍ମିତ କୋଠା ଘରେ ଯୋଜନା ପ୍ରସ୍ତୁତ କରୁଥିଲେ । ଏହି ଘଟଣା ସଂପର୍କରେ ପୋଲିସ ଖବର ପାଇ ଉକ୍ତ ସ୍ଥାନରେ ଚଢ଼ାଉ କରିଥିଲା । ଚଢ଼ାଉବେଳେ ଡକାୟତଙ୍କ ନିକଟରୁ ତେଲେଙ୍ଗା କଟୁରୀ, ଦୁଇ ପଟିଆ ଧାର ଛୁରୀ, ଖେଳନା ବନ୍ଧୁକ, ମୁଖା, ନିଶା ଦ୍ରବ୍ୟ ଓ ୪ଟି ବାଇକ ଜବତ କରିଥିଲା ।