ବାଲେଶ୍ବର: ପୁରୀରୁ ବାଲେଶ୍ଵର ପଢିବା ପାଇଁ ଆସିଥିଲେ । ଅନେକ ସ୍ବପ୍ନ ସାଙ୍ଗକୁ ପରିବାରର ଆଶାବାଡି ପୁଅ କରିଛି ଆତ୍ମହତ୍ୟା । ଅଧୈର୍ଯ୍ୟ ହୋଇ ମାଟିରେ ଲୋଟି ପଡୁଛି ମା' । କେତେ ଆଶାନେଇ ପୁଅକୁ ଏତେ ବାଟରେ ପଢିବା ପାଇଁ ଛାଡିଥିଲା ହେଲେ ପୁଅ ନେଇଗଲା ଚରମ ନିଷ୍ପତ୍ତି । ଯାହା ପାଇଁ ପୁରା ପରିବାର ଅଧୈର୍ଯ୍ୟ ହୋଇପଡିଛି । ଏମିତି କିଛି ଦୃଶ୍ୟ ଆଜି ବାଲେଶ୍ଵର ମେଡିକାଲରେ ଦେଖିବାକୁ ମିଳିଛି ।
ଦକ୍ଷତା ତାଲିମ ନେଉଥିବା ଛାତ୍ରଙ୍କ ଆତ୍ମହତ୍ୟା, ଧୈର୍ଯ୍ୟହରା ପରିବାର
ପୁରୀ ବାଟମଙ୍ଗଳା ଅଞ୍ଚଳର ବିଶ୍ବମ୍ବର ସାହୁଙ୍କ ପୁଅ ବିବେକ(୨୧) ବାମପଦା ଠାରେ ଥିବା ସିପେଟ କଲେଜରେ ଦକ୍ଷତା ତାଲିମ ନେଉଥିଲେ । ସକାଳେ ବିବେକ ଫୋନ କରି ମା'ଙ୍କ ସହ କଥାବାର୍ତ୍ତା ହୋଇଥିଲେ । ପୁଣି ଦିନ ୨ଟା ବେଳେ ମା'ଙ୍କ ନିକଟକୁ ଫୋନ ଆସିଲା ଯେ ପୁଅ ତାଙ୍କର ଫାଶୀ ଲଗାଇ ଦେଇଛି । ମା'ଙ୍କ ପାଦତଳୁ ଯେମିତି ମାଟି ଖସି ଯାଇଥିଲା । ଅଧୈର୍ଯ୍ୟ ହୋଇ ମା' ଦୌଡ଼ି ଆସି ମେଡିକାଲ ପହଁଚିଲା ବେଳକୁ ପୁଅ ଆଖି ବୁଜି ସାରିଥିଲା ।