ବାଲେଶ୍ବର: ମଣିଷ ନିଜ ଖୁସି ପାଇଁ ସାଙ୍ଗସାଥୀ କିମ୍ବା ଜୀବଜନ୍ତୁଙ୍କ ସହ ଥଟ୍ଟାମଜା କରୁଥିବା ଦୃଶ୍ୟ ସାମନାକୁ ଆସିଥାଏ । ହେଲେ ନିକଟରେ ଏକ ଭିଡିଓ ସାମନାକୁ ଆସିଛି ଯେଉଁଠି ମଣିଷ ନିଜ ଖୁସି ପାଇଁ ମାନବିକତା ହରାଇ ଦୁଇଜଣ ମାନସିକ ବିକାରଗ୍ରସ୍ତଙ୍କୁ ସର୍ବସମ୍ମୁଖରେ କରିଛି ବେଇଜ୍ଜତ । ସେତିକିରେ ବି ସରିଲାନି ମଜା କରିବାର ମଉଜ, ଦୁଇଜଣଙ୍କୁ ନେଇ ଟିକଟକ ଭିଡିଓ କରାଯାଇଥିଲା । ଯାହା ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି ।
ଏମିତି ଏକ ଅମାନବୀୟ ଘଟଣା ଦେଖିବାକୁ ମିଳିଛି ବାଲେଶ୍ଵର ଜିଲ୍ଲା ବାହାନଗା ବ୍ଲକ ଗୋପାଳପୁର ବଜାରରେ । ଗୋପାଳପୁର ବଜାରରେ ଦୀର୍ଘଦିନ ଧରି ଜଣେ ମାନସିକ ଭିନ୍ନକ୍ଷମ ବ୍ୟକ୍ତି ରହୁଥିଲେ । କିଛିଦିନ ପୂର୍ବରୁ ଜଣେ ମାନସିକ ଭିନ୍ନକ୍ଷମ ମହିଳା ମଧ୍ୟ ବଜାରରେ ବୁଲୁଥିଲେ । ଏହି ଦୁଇଜଣଙ୍କୁ ନେଇ ମଜା ଦେଖିବା ପାଇଁ କିଛି ଲୋକ ସେମାନଙ୍କୁ ବିବାହ କରିବା ପାଇଁ ବାଧ୍ୟ କରିବା ସହ ମହିଳାଙ୍କୁ ସିନ୍ଦୁର ପିନ୍ଧାଇବା ପାଇଁ ପୁରୁଷକୁ ବାଧ୍ୟ କରାଯାଇଥିଲା। ଫୁଲମାଳ ପିନ୍ଧାଇ ଉଭୟ ଭିନ୍ନକ୍ଷମଙ୍କୁ ବଜାର ବୁଲାଇବା ସହ ସେମାନଙ୍କ ଭିଡିଓ ତିଆରି କରାଯାଇଥିଲା ।