ବାଲେଶ୍ବର: ଏକବିଂଶ ଶତାବ୍ଦୀରେ ବି ସମାଜରୁ ଥମିବାର ନାଁ ନେଉନାହିଁ ଅନ୍ଧବିଶ୍ବାସ । ଯାହାର ଜ୍ବଳନ୍ତ ଦୃଶ୍ୟ ଦେଖିବାକୁ ମିଳିଛି ବାଲେଶ୍ୱର ଜିଲ୍ଲା ଜଳେଶ୍ୱର ବ୍ଲକ ଅନ୍ତର୍ଗତ ଆରୁହା ପଞ୍ଚାୟତର ଆରୁହା ଗ୍ରାମରେ । ଏହି ଗ୍ରାମ ଏକ ଶିକ୍ଷିତ ଗ୍ରାମ ହୋଇଥିଲେ ମଧ୍ୟ ଏଠି ଲୋକମାନେ ଅନ୍ଧବିଶ୍ୱାସର ଶିକାର ହୋଇଥିବା ଦେଖିବାକୁ ମିଳିଛି ।
ସୂଚନାଯୋଗ୍ୟ, ଆରୁହା ଗ୍ରାମରେ ବିମଳ ସିଂଙ୍କ ଏକମାତ୍ର 17 ବର୍ଷୀୟ ଝିଅ ବନିତା ସିଂ ଓରଫ ପୂଜା ଶନିବାର ସନ୍ଧ୍ୟାବେଳେ ସାଳିକୋ ଠାରୁ ଘରକୁ ଫେରୁଥିବା ବେଳେ ତାଙ୍କୁ ଏକ ବିଷାକ୍ତ ସାପ କାମୁଡିଥିଲା । ଏହା ଜାଣିପାରି ସ୍ଥାନୀୟ ଲୋକେ ତାକୁ ହସ୍ପିଟାଲ ନେବାକୁ ଆମ୍ବୁଲାନ୍ସ ଡାକିଥିଲେ । ମାତ୍ର ପୂଜାର ବାପା ଜିଦ୍ କରି ପୂଜାକୁ ସେଠାରୁ 20 କିମି ଦୂର ପିଞ୍ଛବଣିଆରେ ଥିବା ଏକ ଚର୍ଚ୍ଚକୁ ନେଇଥିଲେ । ସେଠାରେ ଥିବା ଫାଦର ଦୀପ ଜାଳି ତାକୁ ଝଡ଼ାଫୁଙ୍କା କରିଥିଲେ । ପରେ ସେ ମନା କରିବାରୁ ଅନ୍ୟତ୍ର ଏକ ଗୁଣିଆ ପାଖକୁ ନେଇଥିଲେ । ଗୁଣିଆ ମଧ୍ୟ ମନା କରିବାରୁ ଶେଷରେ ଜଳେଶ୍ବର ଜିକେ ଭଟ୍ଟର ହସ୍ପିଟାଲକୁ ନେଇଥିଲେ । ହେଲେ ଡାକ୍ତର ରାତି 12ଟାରେ ପୂଜାକୁ ମୃତ ବୋଲି ଘୋଷଣା କରିଥିଲେ ।