ବାଲେଶ୍ଵର: ଖନ୍ତାପଡ଼ା ଥାନା ଅଧିନ ଏକ ଚାଷ ବିଲରେ ସ୍ତ୍ରୀକୁ ନିଆଁରେ ପୋଡ଼ି ହତ୍ୟା କରିବା ପରେ ସ୍ବାମୀ କୀଟନାଶକ ବିଷ ପିଇ ଆତ୍ମହତ୍ୟା ଉଦ୍ୟମ କରିଛି ।
ଭିଡିଓ ସୌଜନ୍ୟ: ସମ୍ବାଦଦାତା, ବାଲେଶ୍ବର ଗୋପାଳପୁର ଫାଣ୍ଡି ଅଧିନ ନୂଆପୁର ଗ୍ରାମର ନୀଳାମ୍ବର ମଳିକ ନିଜ ଘରଠାରୁ ୨.୫ କିମି ଦୂର ଅରଳା ଠାରେ ଏକ ଚାଷ ଜମିରେ ଧାନ ଚାଷ କରନ୍ତି । ସେଠାରେ କ୍ଷେତକୁ ଜଗିବା ପାଇଁ ଏକ ଛୋଟ ପଲ୍ଲା ଘର କରି ଉଭୟ ନୀଳାମ୍ବର ଏବଂ ତାଙ୍କ ସ୍ତ୍ରୀ ସାବିତ୍ରୀ ରହୁଥିଲେ ।
ଶନିବାର ଅପରାହ୍ନରେ ସ୍ତ୍ରୀ ନିଜ ଘର ନୂଆପୁରରୁ ସ୍ୱାମୀଙ୍କ ପାଇଁ ଖାଦ୍ୟ ନେଇ ଚାଷ ଜମିରେ ଥିବା ପଲ୍ଲା ଘରକୁ ଆସିଥିଲେ । ସେଠାରେ କୌଣସି କାରଣରୁ ଉଭୟଙ୍କ ମଧ୍ୟରେ ଝଗଡ଼ା ହେବାରୁ ସ୍ତ୍ରୀକୁ ହତ୍ୟା କରିବା ସହ ଚାଷ ଜମିରେ ଥିବା କୁଟା ଗଦାରେ ପକାଇ ନିଆଁ ଲଗାଇ ପୋଡ଼ି ଦେବା ପରେ ସ୍ୱାମୀ ନୀଳାମ୍ବର କୀଟନାଶକ ପିଇ ଦେଇଥିଲା ।
ପରେ ନୀଳାମ୍ବର ଗୋପାଳପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପହଞ୍ଚି ସ୍ତ୍ରୀକୁ ପୋଡ଼ି ହତ୍ୟା କରିଥିବା ବିଷୟରେ କହିଥିଲା । ଖବର ପାଇ ସନ୍ଧ୍ୟା ସମୟରେ ଗୋପାଳପୁର ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚି ନିଆଁରେ ଜଳୁଥିବା ସ୍ତ୍ରୀର ଅର୍ଦ୍ଧଦଗ୍ଧ ମୃତଦେହକୁ ଉଦ୍ଧାର କରିଥିଲା । ସୋର ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛନ୍ତି । ସ୍ୱାମୀର ଅବସ୍ଥା ଗୁରୁତର ହେବାରୁ ତାଙ୍କୁ ଆମ୍ବୁଲାନ୍ସ ଯୋଗେ ବାଲେଶ୍ୱର ଡାକ୍ତରଖାନାକୁ ପଠାଯାଇଛି ।
ବାଲେଶ୍ବରରୁ ଜୀବନ ଜ୍ୟେତି ନାୟକ, ଇଟିଭି ଭାରତ
