ବାଲେଶ୍ବର ତଳିଆ ଅଞ୍ଚଳବାସୀଙ୍କୁ ସ୍ଥାନାନ୍ତର କଲା ପ୍ରଶାସନ

ବାଲେଶ୍ବର ଜିଲ୍ଲାର ଉପକୂଳବର୍ତ୍ତୀ ଅଞ୍ଚଳର ବାସିନ୍ଦାମାନଙ୍କୁ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତର କରାଉଛି ଜିଲ୍ଲା ପ୍ରଶାସନ ।

ବାଲେଶ୍ୱର: ବାତ୍ୟା ‘ଫନି’କୁ ନେଇ ପ୍ରସ୍ତୁତି ଆରମ୍ଭ କଲାଣି ଜିଲ୍ଲା ପ୍ରଶାସନ । ବାଲେଶ୍ବର ଜିଲ୍ଲାର ଉପକୂଳବର୍ତ୍ତୀ ଅଞ୍ଚଳର ବାସିନ୍ଦାମାନଙ୍କୁ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତର କରାଯାଇଛି । ମାଟି ଘରେ ନରହିବାକୁ ପ୍ରଶାସନ ପକ୍ଷରୁ ସଚେତନ କରାଯାଉଛି ।

ଜିଲ୍ଲାର ଭୋଗରାଇ, ବାହାନଗା, ରେମୁଣା, ସଦର ଓ ବାଲିଆପାଳ ଆଦି ବ୍ଲକରେ ପ୍ରଶାସନ ସତର୍କ ସୂଚନା ଜାରି କରିଛି । ଅପରାହ୍ନଠାରୁ ଲୋକଙ୍କୁ ବାତ୍ୟା ଆଶ୍ରୟସ୍ଥଳୀକୁ ସ୍ଥାନାନ୍ତର କରାଯାଉଛି । ଲୋକମାନେ ଭିଟାମାଟି ଛାଡି ଆସିବାକୁ ଅରାଜି ହେଉଥିବା ବେଳେ ପ୍ରଶାସନ ଦ୍ୱାରା କାର୍ଯ୍ୟ ତ୍ୱରାନ୍ନିତ କରାଯାଉଥିବା ଦେଖିବାକୁ ମିଳିଛି । ଏନଡିଆରଏଫ ଓ ଓଡ୍ରାଫ ଟିମ ମଧ୍ୟ ଲୋକଙ୍କ ସୁରକ୍ଷା ଦିଗରେ ଯତ୍ନବାନ ରହିଛନ୍ତି ।

ଜିଲ୍ଲାପାଳ ଘନଘନ ପ୍ରଶାସନିକ ବୈଠକ ଡାକି ଆଲୋଚନା କରୁଥିବା ବେଳେ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ପାଇଁ ସମସ୍ତ ଅଧିକାରୀଙ୍କୁ ନିର୍ଦ୍ଦେଶ ଦେଉଥିବା ଦେଖିବାକୁ ମିଳିଛି । ସେହିପରି ଚାନ୍ଦିପୁର ସମୁଦ୍ରକୂଳକୁ ପର୍ଯ୍ୟଟକମାନଙ୍କୁ ମନା କରାଯାଇଥିବା ବେଳେ ହୋଟେଲ ଗୁଡିକ ଖାଲି କରିବା ପାଇଁ ମଧ୍ୟ ନିର୍ଦ୍ଦେଶ ଦିଆଯାଇଛି ।

ବାଲେଶ୍ୱରରୁ ଜୀବନଜ୍ୟୋତି ନାୟକ, ଇଟିଭି ଭାରତ