ପର୍ଯ୍ୟଟକଙ୍କ ଠାରୁ ଲୁଟୁଥିଲେ ଟଙ୍କା: 5 ନକଲି ଏମଭିଆଇ ଅଟକ, ଘଟଣାସ୍ଥଳରେ ଉତ୍ତେଜନା

ମିଛ କହି ପର୍ଯ୍ୟଟକଙ୍କ ଠାରୁ ଲୁଟୁଥିଲେ ଟଙ୍କା । ହେଲେ ବେଶୀ ଦିନ ଲୁଚି ରହିଲାନି ଏହି ଅଭିନବ ଉପାୟର ଚୋରୀ । ବାଲେଶ୍ବରରେ 5 ନକଲି ଏମଭିଆଇ ଅଟକ, ଘଟଣାସ୍ଥଳରେ ଉତ୍ତେଜନା ।

ବାଲେଶ୍ଵର : ନକଲି ଏମଭିଆଇଙ୍କୁ ଅଟକ ରଖିଲା ପୋଲିସ । ଜଳେଶ୍ବର ଜାତୀୟ ରାଜପଥରେ ବସ ଅଟକାଇ ଲୁଟୁଥିଲେ 5 ନକଲି ଏମଭିଆଇ । ମିଛ ପରିଚୟ ଦେଇ ବାହାରୁ ଆସିଥିବା ପର୍ଯ୍ୟଟକଙ୍କ ଠାରୁ ଲକ୍ଷ୍ମଣନାଥ ତନଖି ଫାଟକରେ ଲୁଟୁଥିଲେ ଟଙ୍କା ।

ଖବର ପାଇ ଘଟଣାସ୍ଥଳରେ ପହଞ୍ଚିଲା ଜଳେଶ୍ବର ପୋଲିସ । ବସର କାଗଜପତ୍ର ଯାଞ୍ଚ କଲା ପରେ, ବସର ଡ୍ରାଇଭର ଏବଂ ମହିଳା ପର୍ଯ୍ୟଟକଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି । ମହିଳାଙ୍କ ଠାରୁ ସୁନାଗହଣା ଟଙ୍କା ଲୁଟି ନେଇଥିବା ଜଣାପଡିଛି। ଗୁରୁତର ପର୍ଯ୍ୟଟକଙ୍କୁ ଜଳେଶ୍ବର ହସପିଟାଲରେ ଭର୍ତ୍ତି କରାଯାଇଛି।

ପର୍ଯ୍ୟଟକମାନେ ଏହି ଘଟଣାକୁ ନେଇ 60 ନମ୍ବର ଜାତୀୟ ରାଜପଥକୁ ଅବରୋଧ କରିଥିଲେ। ଘଟଣାସ୍ଥଳରେ ଉତ୍ତେଜନା ଲାଗି ରହିଥିଲା। ଦୀର୍ଘ ସମୟ ପରେ ରାସ୍ତାରୋକ ହଟିଥିବା ଜଣାପଡିଛି ।

ବାଲେଶ୍ବରରୁ ଜୀବନ ଜ୍ୟୋତି ନାୟକ,ଇଟିଭି ଭାରତ