ବାଲେଶ୍ଵର: ଜିଲ୍ଲା ସଦର ବ୍ଲକ ପରିଖି ବଳରାମଗଡ଼ିର 10ନଂ ୱାର୍ଡ ଯେଉଁଠି ସ୍ବାଧୀନତା ପରଠାରୁ ଲୋକମାନେ ବିଜୁଳି ଆଲୁଅରୁ ବଞ୍ଚିତ ହୋଇଥିଲେ । ଏହି ଖବର ଇଟିଭି ଭାରତରେ ପ୍ରକାଶ ପରେ ଗାଁ କୁ ହୋଇଛି ବିଦ୍ୟୁତ ସଂଯୋଗ । ଗ୍ରାମର 40 ପରିବାର ଆଜିର ଡିଜିଟାଲ ଯୁଗରେ ବି ଡିବିରି ଆଲୁଅ ଉପରେ ନିର୍ଭର କରୁଥିଲେ । ସଞ୍ଜ ନଇଁଲେ ଡିବିରି ଖୋଜା ପଡ଼ୁଥିଲା। ବିଜୁଳି ଆଲୁଅ ନଥିବାରୁ ପିଲାମାନେ ପାଠ ପଢିବାରେ ନାନା ଅସୁବିଧା ର ସମ୍ମୁଖୀନ ହେଉଥିଲେ। ଗର୍ଭବତୀ ମହିଳାମାନେ ଗର୍ଭାବସ୍ଥା ବେଳେ ଗରମ ଗୁଳୁଗୁଳି ଯୋଗୁଁ ସେମାନେ ଭୋଗୁଥଲେ ଅନେକ କଷ୍ଟ ଓ ଯାତନା ।
ସ୍ବର ସାଜିଲା ଇଟିଭି ଭାରତ, ସ୍ବାଧିନତାର ସାତ ଦଶନ୍ଧି ପରେ ଜଳିଲା ବିଦ୍ୟୁତ
ସେହିପରି ବୟସ୍କ ଲୋକମାନେ ମଧ୍ୟ ଗରମରୁ ରକ୍ଷା ପାଇବା ପାଇଁ ବିଞ୍ଚଣା ବ୍ୟବହାର କରୁଥିଲେ । 3 ବର୍ଷ ପୂର୍ବରୁ ଗ୍ରାମରେ ବିଦ୍ୟୁତ ଖୁଣ୍ଟ ବସିଥିଲା ହେଲେ ସଂଯୋଗ କରାଯାଇ ନଥିଲା । ଏସବୁ ସମସ୍ୟା ଓ ସାଧାରଣ ଲୋକଙ୍କର ଅସୁବିଧା ସମ୍ପର୍କରେ ଆମେ ଏନେଇ ପ୍ରଶାସନ ପାଖରେ ପହଞ୍ଚାଇଥିଲୁ । ଏହାପରେ ପ୍ରଶାସନିକ ସ୍ତରରେ ପଦକ୍ଷେପ ନିଆଯାଇ ଗ୍ରାମକୁ ବିଦ୍ୟୁତ ସଂଯୋଗ କରାଯାଇଛି ।