ବାଲେଶ୍ୱର: ଜଳ ହିଁ ଜୀବନ । ଏହି କଥା ଆମେ ସବୁବେଳେ ଶୁଣିଛେ ଆଉ ଜାଣିଛେ ମଧ୍ୟ । ମାତ୍ର ଜଣେ ବ୍ୟକ୍ତି ଜୀବନ ତମାମ ପାଣି ନ ପିଇ ବଞ୍ଚିବା କେବେ ଶୁଣିଛନ୍ତି ? ହଁ ଏମିତି ଜଣେ ବ୍ୟକ୍ତି ହେଉଛନ୍ତି ବାଲେଶ୍ଵର ଜିଲ୍ଲା ରେମୁଣା ବ୍ଲକ ମନ୍ଦାରପୁର ପଞ୍ଚାୟତ ଦୋଳଗୋହିରା ଗାଁର 108 ବର୍ଷୀୟ କେଦାର ଗିରି ।
କେଦାର ଗିରି ଯିଏକି ପିଲା ଦିନରୁ ଆଜି ପର୍ଯ୍ୟନ୍ତ କେବେ ବି ପାଣି ପିଇ ନାହାଁନ୍ତି । ତାଙ୍କୁ ବର୍ତ୍ତମାନ ୧୦୮ବର୍ଷ ବୟସ । ତାଙ୍କର ପତ୍ନୀ ସ୍ଵର୍ଗାରୋହଣ କରିଥିବା ବେଳେ ଝିଅ 2 ଜଣ ବହୁ ବର୍ଷ ପୂର୍ବରୁ ବିବାହ କରି ଶାଶୁ ଘରକୁ ଚାଲି ଯାଇଥିଲେ। ତେବେ ଜରାଗ୍ରସ୍ତ ବାପାଙ୍କ ସେବା ସୁଶ୍ରୁଷା କରିବା ଲାଗି ବଡ ଝିଅ ଜ୍ବାଇଁ ଓ ତାଙ୍କ ପିଲାମାନେ କେଦାର ଗିରିଙ୍କ ଘରେ ରହୁଛନ୍ତି । କେଦାର କେବେ ପାଣି ପିଇ ନାହାନ୍ତି, ଖାଇଲା ବେଳେ ଖାଦ୍ୟ ତଣ୍ଟିରେ ଲାଗିଗଲେ କିମ୍ବା ହେକୁଟି ହେଲେ ମଧ୍ୟ ପାଣି ପିଅନ୍ତି ନାହିଁ । ପାଣି ପିଇବା ପାଇଁ କହିଲେ ସେ ରାଗିଯାଇ ଗାଳି ଦିଅନ୍ତି । ଆଜି ପର୍ଯ୍ୟନ୍ତ କେଦାର କୌଣସି ଜଟିଳ ରୋଗରେ ଆକ୍ରାନ୍ତ ହୋଇ ନାହାନ୍ତି । ତାଙ୍କୁ ରୋଗ ହେଲେ ଡାକ୍ତର ଆସନ୍ତି, ସାଲାଇନ ଲଗାନ୍ତି, ଔଷଧ ଦେଲେ ସେ ବିନା ପାଣିରେ ଢ଼ୋକି ଦିଅନ୍ତି ବୋଲି କହିଛନ୍ତି ତାଙ୍କ ପଡୋଶୀ ।
ତେବେ କେଦାରଙ୍କୁ ଯେତେବେଳେ ଦଶ ବାର ବର୍ଷ ବୟସ ହେଇଥିଲା, ସେହି ଦିନରୁ ସେ ପାଣି ପିଇବା ଛାଡି ଦେଇଛନ୍ତି। ପାଣି ପିଇଲେ ସେ ଅସୁସ୍ଥ ହୋଇଯାଆନ୍ତି ବୋଲି ଖୋଦ କହିଛନ୍ତି । ପାଣି ପିଇଲେ ସେ ବାନ୍ତି କରି ଦିଅନ୍ତି, ପାଣି ତାଙ୍କୁ ଭାରି ଫସକା ଲାଗୁଥିବା ସେ କହିଛନ୍ତି । 108 ବର୍ଷ ବୟସରେ ବି କେଦାର ଫିଟ ରହିବା ସହ ପୁରା ସ୍ପଷ୍ଟ ଭାବେ କଥା କହି ପାରୁଛନ୍ତି । ଏପରିକି ସେ ସମସ୍ତ ଖାଦ୍ୟ ମଧ୍ୟ ଗ୍ରହଣ କରିଥାନ୍ତି । ତେବେ ତାଙ୍କ ପାଖରେ ‘ମୁଁ ତୁମର ସାଥି ସଂଗଠନ’ ପହଞ୍ଚି ତାଙ୍କୁ ସମ୍ମାନିତ କରିଛି ।