ବାଲେଶ୍ବର: ବାଲିଆପାଳ ଥାନା ସମ୍ମୁଖରେ ବୃଦ୍ଧ ଦମ୍ପତି ନ୍ୟାୟ ଭିକ୍ଷା କରି ଶେଷରେ ନିଜ ଦେହରେ କିରୋସିନ ଢାଳି ଆତ୍ମହତ୍ଯା ଉଦ୍ଯମ କରିଥିବା ଦେଖିବାକୁ ମିଳିଛି । ପ୍ରାପ୍ତ ଖବର ଅନୁସାରେ, ବାଲିଆପାଳ ଥାନା ରାଉତୁରା ଗ୍ରାମର ଗୌରାଙ୍ଗ ପାଣିଗ୍ରାହୀଙ୍କ ଜମିରେ ସେହି ଗ୍ରାମର ଅନନ୍ତ ଗିରି ଓ ଅର୍ଜୁନ ଗିରି ଜୋରଜବରଦସ୍ତ ପ୍ରଧାନମନ୍ତ୍ରୀ ଆବାସ ଯୋଜନାରେ ଗୃହ ନିର୍ମାଣ କରୁଛନ୍ତି ।
ଏହାକୁ ନେଇ ଗୌରାଙ୍ଗ ବାଲିଆପାଳ ତହସିଲଦାର ଓ ପୋଲିସ ପାଖରେ ଅଭିଯୋଗ କରିଥିଲେ । ଏହାସହ ଉକ୍ତ ଘଟଣାକୁ ନେଇ କୋର୍ଟରେ ରହିତାଦେଶ ଜାରି କରାଯାଇଥିଲେ ମଧ୍ଯ କୋର୍ଟଙ୍କ ଆଦେଶକୁ ଅବମାନନା କରି ସେମାନେ ଗୃହ ନିର୍ମାଣ କରୁଛନ୍ତି । ଏହାର ପ୍ରତିବାଦ କରିବାରୁ ବୃଦ୍ଧ ଦମ୍ପତ୍ତିଙ୍କୁ ପିଟାମରା କରିବା ସହ ଜୀବନରୁ ମାରି ଦେବାକୁ ସେମାନେ ଧମକ ଦେଉଥିବା ଅଭିଯୋଗ ହୋଇଛି । ବାରମ୍ବାର ନ୍ୟାୟ ପାଇଁ ଦୌଡ଼ିଦୌଡ଼ି ନୟାନ୍ତ ହେବାପରେ ଶେଷରେ ବୃଦ୍ଧ ଦମ୍ପତି ଏମିତି ନିଷ୍ପତ୍ତି ନେଇଥିବା ଜଣାପଡିଛି । ତେବେ ଆତ୍ମାହୁତି ଉଦ୍ୟମ ବେଳେ ପୋଲିସ ଦମ୍ପତ୍ତିଙ୍କ ପାଖରେ ପହଞ୍ଚି ସେମାନଙ୍କୁ ଉଦ୍ଧାର କରିବା ସହ ଘଟଣାର ତଦନ୍ତ କରିବ ବୋଲି କହିଥିବା ଜଣାପଡିଛି ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ