ବାଲେଶ୍ବର: ଜିଲ୍ଲାରେ ବିଜୁଳି ଦର ବୃଦ୍ଧିକୁ ନେଇ କଂଗ୍ରେସ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଛି । କଂଗ୍ରେସ କର୍ମୀମାନେ ଟାଟା ପାୱାର ଅଫିସ ସମ୍ମୁଖରେ ଆନ୍ଦୋଳନ କରି ବିଜୁଳି ଦର କମାଇବା ପାଇଁ ଦାବି କରିଛି ।
କୋରୋନା ସମୟରେ ତୈଳଦରଠାରୁ ଆରମ୍ଭ କରି ବିଭିନ୍ନ ଅତ୍ୟାବଶକୀୟ ସାମଗ୍ରୀ ଦରବୃଦ୍ଧି ହୋଇଥିବା ବେଳେ ପୁଣି ବିଜୁଳି ଦରବୃଦ୍ଧି ସାଧାରଣ ଲୋକଙ୍କ ଉପରେ ଦାଉ ସାଧିଛି । ନେସ୍କୋଠାରୁ ବିଜୁଳି ପରିବଣ୍ଟନ ଦାୟିତ୍ୱ ଟାଟାକୁ ହସ୍ତାନ୍ତର କରିଥିବା ବେଳେ 30 ପଇସାରୁ 50 ପଇସା ୟୁନିଟ ପିଛା ଦରବୃଦ୍ଧିକୁ କଂଗ୍ରେସ ବିରୋଧ କରିଛି।
ବିଜୁଳି ଦରବୃଦ୍ଧି ପ୍ରତ୍ୟାହାର ପାଇଁ କଂଗ୍ରେସ ପକ୍ଷରୁ ରାଜ୍ୟପାଳଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରାଯାଇଛି । ଏହାସହ ମଙ୍ଗଳବାର ଦରବୃଦ୍ଧି ପ୍ରତିବାଦରେ ସମସ୍ତ ବ୍ଲକ କାର୍ଯ୍ୟାଳୟ ଆଗରେ ଧାରଣା ଦିଆଯିବା ନେଇ ନିଷ୍ପତ୍ତି ନିଆଯାଇଛି । ଦାବି ପୂରଣ ନହେଲେ ଆଗାମୀ ଦିନରେ ଆନ୍ଦୋଳନ କରାଯିବ ବୋଲି ଚେତାବନୀ ଦିଆଯାଇଛି ।
ଅନ୍ୟପଟେ ରବିବାର ରାଜଧାନୀରେ କଂଗ୍ରେସ ଭବନ ସମ୍ମୁଖରେ କର୍ମୀମାନେ ଏହାକୁ ବିରୋଧ କରି ଅଭିନବ ଉପାୟରେ ପ୍ରତିବାଦ କରିଥିଲେ । ସେମାନେ ସନ୍ଧ୍ୟା 6.30ରୁ 7 ଟା ପର୍ଯ୍ୟନ୍ତ ଅଧଘଣ୍ଟା ବିଜୁଳି ସରବରାହ ବନ୍ଦ କରି ବିଜୁଳି ଦର ବୃଦ୍ଧି ବିରୋଧରେ ପ୍ରତିବାଦ କରିଥିଲେ ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ