ବାଇକ ଦୁର୍ଘଟଣାରେ ବଡ଼ ମା' ମୃତ, ପୁତୁରା ଗୁରୁତର

ବାଲେଶ୍ବର ଜିଲ୍ଲା ସଦର ଥାନା କସବା ଫାଣ୍ଡି ଅଧିନ ନଦୀଗାଁ ଛକରେ ଏହି ଦୁର୍ଘଟଣା ଘଟିଛି ।

ବାଲେଶ୍ବର: ଟ୍ରାକ୍ଟର-ବାଇକ ଧକ୍କାରେ ବଡ଼ ମା ମୃତ, ପୁତୁରା ଗୁରୁତର । ବାଲେଶ୍ବର ଜିଲ୍ଲା ସଦର ଥାନା କସବା ଫାଣ୍ଡି ଅଧିନ ନଦୀଗାଁ ଛକରେ ଏହି ଦୁର୍ଘଟଣା ଘଟିଛି । ଘରୁ ଏକାସାଙ୍ଗରେ ବଡ ମାଆ ଓ ପୁତୁରା ବାଇକରେ ବାହାରି ଥିବାବେଳେ ଏକ ଟ୍ରାକ୍ଟର ସହ ଧକ୍କା ହୋଇଥିଲା । ପୁତୁରାଙ୍କୁ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି କରାଯାଇଛି ।

ମୃତ ମହିଳା ଜଣକ ଚାନ୍ଦିପୁର ଥାନା ପଦ୍ମପୁର ଗ୍ରାମର ଖୁସି ଦଳେଇ ହୋଇଥିବାବେଳେ ଆହତ ଯୁବକ ଜଣକ ତାଙ୍କ ପୁତୁରା ବାପୁନୁ ଦଳେଇ । ପଦ୍ମପୁର ଗ୍ରାମରୁ ବାପୁନୁ ଆଜି ପୂର୍ବାହ୍ନରେ ନିଜ ବାଇକରେ ବଡ଼ ମା' ଖୁସି ଦଳେଇଙ୍କୁ ବସାଇ ଖନ୍ତାପଡ଼ା ଥାନା ଅଧିନ ଟିଣାସ୍ଥିତ ତାଙ୍କ ମାମୁଁ ମଦନ ଦଳେଇଙ୍କ ଘରକୁ ଯାଉଥିଲେ ।

ନଦୀଗାଁ ଛକଠାରେ ହଠାତ ଏକ ଟ୍ରାକ୍ଟର ତାଙ୍କୁ ଧକ୍କା ଦେଇଥିଲା । ଏଥିରେ ଘଟଣାସ୍ଥଳରେ ଖୁସିଙ୍କ ମୃତ୍ୟୁ ହୋଇଛି । ଅନେକ ସମୟରେ ପ୍ରଶାସନ ଟ୍ରାକ୍ଟର ଡ୍ରାଇଭରଙ୍କ ଉପରେ କଡା ଆଭିମୁଖ୍ୟ ନେଉ ନଥିବାରୁ ଏମିତି ଦୁର୍ଘଟଣା ଘଟୁଛି ବୋଲି ଅଭିଯୋଗ ହେଉଛି । ପୋଲିସ ଘଟଣାର ତଦନ୍ତ କରୁଛି ।

ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ