ବାଲେଶ୍ବର: ରାଜ୍ୟରେ ଟ୍ରାଫିକର ନୂଆ ଆଇନ ଲାଗୁ ହେବା ପରେ ପୋଲିସ ଏବଂ ସାଧାରଣ ଲୋକଙ୍କ ମଧ୍ୟରେ ଚାଲିଛି ଛକାପଞ୍ଝା । ଟ୍ରାଫିକ ନିୟମ ଭାଙ୍ଗୁଥିବା ଗାଡିଚାଳକଙ୍କ ଠାରୁ ଅଧିକ ଟଙ୍କା ଜରିମାନା ନେବା ପରେ ସାଧାରଣରେ ଅସନ୍ତୋଷ ପ୍ରକାଶ ପାଇଛି । ତେବେ ଜନତା ମଧ୍ୟ କମ ନୁହଁନ୍ତି । ବର୍ତ୍ତମାନ ପୋଲିସ ଏହି ନିୟମକୁ କେତେଦୂର ପାଳନ କରୁଛି ତାହାକୁ ମଧ୍ୟ ନଜର ରଖୁଛନ୍ତି ଲୋକେ । ଆଉ ଏହାର ପ୍ରଭାବ ଦେଖିବାକୁ ମିଳିଛି ବାଲେଶ୍ବରରେ ।
ନୂତନ ମୋଟର ଯାନ ଆଇନ ଲାଗୁ ହେବାପରେ ବାଲେଶ୍ଵର ପୋଲିସ କରିଥିଲା ଜୋରଦାର ଚେକିଂ । ହେଲେ ଖୋଦ ପୋଲିସ ନିୟମ ଭାଙ୍ଗିବାରେ ଲୋକଙ୍କୁ ବି ବଳି ଯାଇଥିବା ଦେଖିବାକୁ ମିଳିଛି । ଯାହାର ଚିତ୍ର ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ସହରର ଏଡିଏମ ଛକ ନିକଟରେ 2ଜଣ ମହିଳା ପୋଲିସ ସହ ଜଣେ ପୁରୁଷ ପୋଲିସ ଗୋଟିଏ ବାଇକରେ ଯାଉଥିବା ଦେଖିବାକୁ ମିଳିଛି । ଯାହାର ଭିଡିଓ ଏବେ ଭାଇରାଲ ହେବାରେ ଲାଗିଛି। ନିୟମ ଭଙ୍ଗ କରିଥିବା ପୋଲିସଙ୍କଠାରୁ କେଉଁ ପ୍ରକାର ଜରିମାନା ଆଦାୟ କରାଯିବ ତାହା ଉପରେ ସମସ୍ତଙ୍କ ନଜର ।
ବାଲେଶ୍ବରରୁ ଜୀବନ ଜ୍ୟୋତି ନାୟକ, ଇଟିଭି ଭାରତ