ବାଲେଶ୍ଵର: ରାଜରାସ୍ତାରେ ଗର୍ଜିଲେ ବାଲେଶ୍ଵର ଜିଲ୍ଲା +୨ ଓ +୩ ଅଧ୍ୟାପକ ଓ କର୍ମଚାରୀ ସଂଘ । ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିଭିନ୍ନ ଦାବି ନେଇ କଲେ ବିକ୍ଷୋଭ ପ୍ରଦର୍ଶନ । ଦାବି ମାଧ୍ୟମରେ ଅଧ୍ୟାପକ ଓ କର୍ମଚାରୀଙ୍କ ପ୍ରତି ହୋଇଥିବା ପାତର ଅନ୍ତର ନୀତି ବିରୋଧରେ ଜିଲ୍ଲାପାଳଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ଏକ ଦାବିପତ୍ର ପ୍ରଦାନ କରିଛି ସଂଘ ।
ସୂଚନା ଅନୁସାରେ, ୨୦୨୧ ମସିହା ଡିସେମ୍ବର ମାସ ୩୦ ତାରିଖରେ ରାଜ୍ୟ ସରକାର ଏକ କ୍ୟାବିନେଟ ବୈଠକ ମାଧ୍ୟମରେ ଉଭୟ ୬୬୨ ଓ ୪୮୮ ବର୍ଗର ସମାନ ଧାରାରେ କାମ କରୁଥିବା ଅଧ୍ୟାପକ ଓ କର୍ମଚାରୀମାନଙ୍କ ଦରମା ସମାନ କରିଥିଲେ । ପ୍ରାୟ ଏକ ବର୍ଷଧରି କର୍ମଚାରୀମାନେ ସମାନ ଦରମା ମଧ୍ୟ ପାଇ ଆସୁଥିଲେ । ମାତ୍ର ତାର ଠିକ୍ ଏକବର୍ଷ ପରେ ଅର୍ଥାତ୍ ୨୦୨୩ ମସିହା ଜାନୁଆରୀ ମାସରେ ଆଉ ଏକ କ୍ୟାବିନେଟ୍ କରି ସେ ନିୟମର ପରିବର୍ତ୍ତନ କରି ଏକ ବିରାଟ ଅସଙ୍ଗତି ସୃଷ୍ଟି କରାଗଲା । ଯାହା ଫଳରେ ସମାନ କାମକୁ ସମାନ ଦରମା ମିଳିଲା ନାହିଁ । ଯାହାଫଳରେ ସରକାର ବିଭିନ୍ନ ବର୍ଗର ଅଧ୍ୟାପକଙ୍କୁ ସମାନ କାର୍ଯ୍ୟକୁ ଭିନ୍ନ ଭିନ୍ନ ଦରମା ଦେଉଥିବା ଅଭିଯୋଗ କରିଛନ୍ତି ଅଧ୍ୟାପକ ଓ କର୍ମଚାରୀ ସଂଘ । ଏହି ନିୟମକୁ ବିରୋଧ କରି ଓ ସମାନ କାମକୁ ସମାନ ଗ୍ରେଡ଼ ପେ ଓ ଦରମା ସହିତ ଅନ୍ୟ ତିନୋଟି ଦାବି ନେଇ ଭୁବନେଶ୍ୱର ଠାରେ ଆନ୍ଦୋଳନ କରିଛି ସଂଘ ।