ବାଲେଶ୍ଵର:ବିଜେପି ସରକାରର ବିରୁଦ୍ଧରେ ଗର୍ଜିଲା ବାଲେଶ୍ଵର ଜିଲ୍ଲା କଂଗ୍ରେସ । ରାହୁଲ ଗାନ୍ଧୀଙ୍କ ବିରୋଧରେ ମୋଦୀ ସରକାରଙ୍କ ଉଦ୍ଦେଶ୍ୟମୂଳକ ଭାବେ କରାଯାଇଥିବା ମକଦ୍ଦମା ଏବଂ ଦଣ୍ଡାଦେଶ ବିରୋଧ କରି କଂଗ୍ରେସ ପକ୍ଷରୁ ବିକ୍ଷୋଭ ପ୍ରଦର୍ଶନ । ବାଲେଶ୍ଵର ସହରର ଫକୀର ମୋହନ ଗୋଲେଇ ନିକଟରେ ମୋଦୀ ସରକାର ବିରୁଦ୍ଧରେ କ୍ଷୋଭ ପ୍ରକାଶ କରିଛନ୍ତି କଂଗ୍ରେସ କର୍ମକର୍ତ୍ତା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ କୁଶ ପୁତ୍ତଳିକା ଦାହ କରିବା ସହ ମୋଦି ସରକାର ବିରୁଦ୍ଧରେ ନାରା ଦେଇଛି । ରାହୁଲଙ୍କ ସାଂସଦ ପଦ ରଦ୍ଦ ନେଇ ସହ ରାହୁଲ ଗାନ୍ଧୀଙ୍କୁ 2 ବର୍ଷ ଜେଲ ଦଣ୍ଡାଦେଶକୁ ନେଇ ତାତିଛି କଂଗ୍ରେସ ।
ରାହୁଲ ଗାନ୍ଧୀଙ୍କ ପ୍ରତି ମୋଦି ସରକାର ଷଡ଼ଯନ୍ତ୍ର କରିଥିବା ଅଭିଯୋଗ କରିଛି ଜିଲ୍ଲା କଂଗ୍ରେସ । ଜିଲ୍ଲା କଂଗ୍ରେସର ଅଭିଯୋଗ ଅନୁସାରେ, କେନ୍ଦ୍ର ସରକାର ତାନସାହି ଚଳାଇଛି । ଆଦାନୀ ଦୁର୍ନୀତି ସମ୍ପର୍କରେ ରାହୁଲ ଗାନ୍ଧୀ ଜୋରଦାର ବିରୋଧ କରିବା ସହ ଏଥିପାଇଁ ମୋଦି ସରକାରଙ୍କୁ ଟାର୍ଗେଟ କରୁଛନ୍ତି । ଏହାସହିତ ୨୦୧୯ ମସିହାରେ 28 ଜଣ ଭାରତୀୟ ଦେଶର ଟଙ୍କା ବୁଡାଇ ଦୁର୍ନୀତିରେ ସମ୍ପୃକ୍ତ ହୋଇ ଭାରତରୁ ଫେରାର ହୋଇ ଯାଇଛନ୍ତି । ଏହାକୁ ନେଇ ରାହୁଲ ଗାନ୍ଧୀ ବହୁବାର କେନ୍ଦ୍ର ସରକାରଙ୍କୁ ବିରୋଧ କରିବା ସହ ଏହା ପଛରେ ମୋଦିଙ୍କ ହାତ ଥିବା କହିଥିଲେ । ଜଣେ ବିରୋଧୀ ଦଳର ନେତା ହିସାବରେ ରାହୁଲ ଗାନ୍ଧୀ କୌଣସି ପ୍ରକାର ଖରାପ ବ୍ୟବହାର କିମ୍ବା କୌଣସି ଅଶାଳୀନ ମନ୍ତବ୍ୟ ଦେଇ ନଥିବା ବେଳେ ଉଦ୍ଦେଶ୍ୟମୂଳକ ଭାବେ ଷଡଯନ୍ତ୍ର କରି ତାଙ୍କୁ ଫସାଇ ଦିଆଯାଇଥିବା ଜିଲ୍ଲା କଂଗ୍ରେସ ସଭାପତି କହିଛନ୍ତି ।