ଛେଳି ଖାଇଲା ଚାଉଳ, ଗିରଫ ପାଇଁ ଥାନାରେ ପହଞ୍ଚିଲେ ଯୁବକ

ଘରେ ପଶି ଚାଉଳ ଖାଇବା ଅଭିଯୋଗରେ ଛେଳିକୁ ବାନ୍ଧିବା ପାଇଁ ଛେଳି ସହ ଥାନାରେ ପହଞ୍ଚିଲେ ଯୁବକ । ଅଧିକ ପଢ଼ନ୍ତୁ

ବାଲେଶ୍ବର: ଛେଳି ଖାଇଲା ଚାଉଳ । ପଡିଶା ଘର ଛେଳିକୁ ଗିରଫ କର ଥାନା ବାବୁ । ଏମିତି ଏକ ଅଭିଯୋଗ ନେଇ ଥାନାର ଦ୍ବାରସ୍ଥ ହେଲେ ଯୁବକ ।

ଏମିତି ଏକ ଘଟଣା ଆପଣଙ୍କୁ ଆଶ୍ଚର୍ଯ୍ୟ କରୁଥିବ ନିଶ୍ଚୟ । ହଁ ଆଜ୍ଞା ଏ ଘଟଣା ହେଉଛି ବାଲେଶ୍ବର ଜିଲ୍ଲା ସୋର ଥାନା ଅଧୀନ ଚିନ୍ତାମଣିପଦା ଅଞ୍ଚଳର । ପଡିଶା ଘର ଛେଳି ଆସି ଚାଉଳ ଖାଇ ଦେବାରୁ ଛେଳିକୁ ସାଙ୍ଗରେ ନେଇ ଥାନାରେ ହାଜର ହୋଇଥିଲେ ଯୁବକ ।

ପୁରା ଘଟଣା ଏମିତି, ଗାଁର କୁଚିଆ ନାମକ ଯୁବକଙ୍କ ଘରେ କିଛିଦିନ ପୂର୍ବରୁ ତାଙ୍କ ପଡ଼ୋଶୀଙ୍କ ଛେଳି ପଶି ଚାଉଳ ଖାଇଥିଲା । ଏହାପରେ ଉତିକ୍ଷିପ୍ତ ହୋଇପଡିଥିଲେ କୁଚିଆ । ଛେଳିଟିକୁ ମାରି ତା ମାଂସ ଖାଇଦେଇଥିଲେ । ଏହି ଘଟଣା ପହଞ୍ଚିଥିଲା ଥାନାରେ । ଛେଳି ମାଲିକଙ୍କ ଅଭିଯୋଗ ପରେ 8 ହଜାର ଟଙ୍କା ଜୋରିମାନା ଗଣିଥିଲେ କୁଚିଆ ।

ହେଲେ ଏଥର ପୁଣି ଛେଳି ଚାଉଳ ଖାଇବାକୁ ଘରେ ପଶିବାରୁ ଛେଳିକୁ ନେଇ ଥାନାରେ ପହଞ୍ଚିଥିଲେ ସେ । ଆଉ ତାଙ୍କର ଗୋଟିଏ ଦାବି ଥିଲା ଛେଳିକୁ ଗିରଫ କର । ଏଭଳି ଘଟଣା ଏବେ ସମଗ୍ର ଅଞ୍ଚଳର ଚର୍ଚ୍ଚାର ବିଷୟ ପାଲଟିଛି ।

ବାଲେଶ୍ବରରୁ ଜୀବନଜ୍ୟୋତି ନାୟକ, ଇଟିଭି ଭାରତ